Paco Rabanne trintxerpetarra hil da
Goi mailako moda diseinatzailea 88 urte zituela hil da, Bretainian. Txikitan erbestera joan, eta 1996an itzuli zen lehenengoz sorterrira.
[AURRERAPENA]
Francisco Rabaneda Cuervo trintxerpetarra (Pasaia 1934-Portsall 2023) gaur hil da 88 urte zituela. Goi mailako jostuna, nazioartean oso ezaguna.
Ama Cristobal Balenciaga diseinatzailearen jostun nagusi zen Euskal Herrian bizi ziren bitartean, eta hortik datorkio joskintzarako eta goi mailako jantzigintzarako zaletasuna. Aita, berriz, 1936ko gerran Errepublikako armadaren jeneral izan zen, eta Francoren indar faxistek harrapatu, eta fusilatu egin zuten. Orduan, 5 urte zituela, joan zen amarekin eta beste hiru anaia-arrebekin Frantziako erbestera.
Jada gazte, Frantziako Goi Mailako Arkitektura fakultatean (Parisen) hasi zituen ikasketak. Han indartu zuen joskintzarako sena, bere diseinuen itxura metalikoetan, adibidez, eragina izan zuena.
1996an itzuli zen lehen aldiz Trintxerpera, sorterrira. Handik aurrera, harreman estuago izan zuen jaioterriarekin. Kaiko Herreraren eta Pasaiaren biziberritze prozesuaren harira, horretan lanean izan zen La Herra Herrira lantaldeak egindako Kaiko Herrera Biziberritzeko Herri Proposamenean (udalak ere onartu egin zuen biziberritzerako proposamena), Rabanne Espazioa egiteko aukera landu zuen.
