[Bideoa] Heldu direla, bai, Ihoteak
Lau egun besterik ez dira falta Ihoteak hasteko. Antolatzaileek ekitaldi guztiak prest dituzte, eta bideoa ere argitaratu dute.
Gutxiago falta da intxixuak iristeko. Lau egun eta ordu batzuk besterik ez dira falta intxixu, sorgin eta basandreak Oiartzungo plaza har dezaten.
Datorren ostiralean hasiko dira ihoteak, eta dena prest dago herriko txoko guztietara Oiartzungo festa propio hori irits dadin. Iaz festa murriztua izan zen, COVID-19a dela eta, baina aurten ohiko ekitaldi guztiekin iritsiko da.
Motorrak are gehiago berotzen joateko, bideo bat ere prestatu dute Oihan Gastesi eta Ekain Susperregik. Musika elkarlanean aritu dira Gastesi bera eta Julen Etxebeste Liras.
Egitaraua
Hilak 10 (ostirala)
- 16:45: Burrunbaaa! ihoteei deia, Beheko plazako biribilgunetik.
- 17:30: Txokolatada Done Eztebe plazan.
- 19:00: Azeri eta Sorgin dantza.
- 19:30: Intxixu, Basandre eta Sorginek plaza hartuko dute.
Hilak 11 (larunbata)
- 09:00etatik aurrera Kuestaziyua herriko auzoetan.
- 14:30: bazkariak egingo dituzte auzo guztietan.
- 18:00: auzoetan ibilitako kuadrillak plazan elkartuko dira. Ondoren, ihoteen berbena, musikarekin.
Hilak 12 (igandea)
- 09:00: Diana txistulariekin.
- 11:00: beheko plazatik karroxa eta kalejira alaia.
- 19:00: Intxixu, Basandre eta Sorginei agurra. Ondoren. bukaera emateko, suzko akerra.
