Logroñes suntsitu dute OKEko neskek
Oiartzuarrek 4-1 irabazi diete errioxarrei, eta markagailuan motz geratu dira. Mutilek hobeto jokatu arren, galdu egin dute.
Larunbat arratsaldeko partida menperatu zuen hamaikakoa. Oiartzun Kirol Elkarteko nesken talde nagusiak gustua ematen duen garaipenetako bat lortu zuen pasa den larunbatean.
Logroñesen bisita jaso zuten Karla Lekuonan, eta talde bakarra izan zen Ugaldetxoko berdegunean. Etxekoek partida osoan izan zuten jokoaren gidaritza, eta aukera ugari sortu zituzten arren, 2-0eko markagailuarekin iritsi ziren atsedenaldira.
Bigarren zatian are sakontasun handiagoa aurkitu zuten oiartzuarrek, eta beste bi gol lortu zituzten. Errioxarrek ohorearen gola sartzea lortu zuten. Talde urdinaren goleatzaileak Ixiar, Lizaso, Jone eta Nahia izan ziren.
Oiartzuarrek sailkapeneko bosgarren postuan jarraitzen dute, eta asteburuan Nafarroara joan beharko dira, Berriozarren kontra indarrak neurtzera.
Mutilen porrota
Mutilen futbol talde nagusiak ere partida polita jokatu zuten Elgoibarren, baina ez zuten zortea aldeko izan. Hori bai, ez zuten ate aurrean asmatzerik lortu.
Partida berdinketarekin bukatuko zela zirudienean, elgoibartarrek lehenengo gola 89. minutuan sartu zuten. Oiartzuarrak etxekoen area setiatzen ari zirenean, baloia berreskuratu zuten Haundixa-koek, eta bigarrena sartu zuten.
Mutilen taldea ere bosgarren da sailkapenean, arerioaren atzetik.
Garaipenik ez
Areto futbolean, Lehen Mailako taldeak Oñatiko Ingou Coinbroker Aloñaren kontra jokatu zuen, eta golik gabe bukatu zen partida, nahiz eta aukerak izan zituzten.
Miren Tabernak, berriz, aurreko asteazkenean jokatu zuen, Tolosan. Lehenengo zatian oiartzuarrek eraman zuten jokoaren lema, baina ez zuten ate aurrean asmatu, eta 2-0 joan ziren aldageletara.
Bigarrenean, oiartzuarrek arriskatu egin zuten, baina gauzak ez ziren aurreikusi bezala atera, eta 7-3 bukatu zuten.
Emakumeen Lehen Nazional Maila
- Oiartzun — Logroñes: 4-1.
Gizonezkoen Ohorezko Erregional Maila
- Elgoibar — Oiartzun: 2-0.
Emakumeen Euskal Liga
- Basauri Kimuak — Oiartzun B: 3-1.
Gizonen Gorengo Maila
- Hondarribia — Oiartzun B: 3-2.
Emakumeen Gorengo Maila
- Antigua Luberri — Oiartzun C: 1-2.
Mutilen Gazte Mailako Nazional Maila
- Oiartzun — Getxo: 1-2.
Mutilen Gazte Mailako Gorengo Maila
- Oiartzun B — Trintxerpe: 2-2.
Mutilen Gazte Mailako Lehen Maila. Kopa
- Touring C — Oiartzun: 3-2.
ARETO FUTBOLA
Gizonen Gipuzkoako Lehen Maila
- Oiartzun KE — Ingou Coinbroker Aloña: 0-0.
Gizonen Gipuzkoako Bigarren Maila
- Laskorain — Miren Taberna OKE: 7-3.
