Arango mendilerrora irteera antolatu dute iganderako
Itsastarrak Mendi Taldeak eta Herrerako Mendizaleek antolatu dute irteera. Igandean abiatuko dira, Trintxerpetik.
Mendizaleak, Itsastarrak eta Herrerako taldeek antolaturiko azken irteeran. 
Arango mendilerrora (Araba) irteera antolatu dute Itsastarrak eta Herrerako mendi taldeek elkarlanean, datorren iganderako —hilak 12—. Autobusa 07:00etan irtengo da, Trintxerpeko kaitik. Bazkideentzako prezioa 18 eurokoa da, eta bazkide ez direnek 2 euro gehiago ordaindu beharko dituzte.
Hiru ibilbide proposatu dituzte antolatzaileek: luzea, ertaina eta laburra. Horra bakoitzari buruzko xehetasunak:
- Ibilbide luzea: Bidea Oletan hasiko dute, Aramaio auzoan, 582 metrora, eta Ibarra auzoan (340 m) bukatuko da. Ibilbide osoa, gailurrekin, 16,64 kilometrokoa da, 900 metroko desnibel positiboarekin, eta 1150 metroko negatiboarekin. Iraupena, geldialdiak zenbatu gabe, 6 ordukoa.
Gailurrik gabeko ibilbidea egitea ere aukera daiteke. 15 kilometroko distantzia du horrek, 750 metroko desnibel positiboa, 1000 metroko negatiboa, eta 5 orduko iraupena, geldialdiak zenbatu gabe. - Ibilbide ertaina: Aurrekoaren puntu berdinetan hasi eta bukatuko da. Bide osoak 12,25 kilometroko distantzia du, 450 metroko desnibel positiboa, eta 700 metroko negatiboa. Iraupena, atsedenaldirik gabe, 4 ordukoa da.
- Ibilbide laburra: San Kristobal baselizatik San Kristobal herriraino (Ibarra) joango dira. Ibilbide gehiena maldan behera da, denera 5 kilometro inguru. 100 metroko desnibel positiboa du eta 500 metroko desnibel negatiboa. Iraupena 2 eta 3 ordu bitartekoa da.
