Bueltan da gazteentzako Motxian Eby bideo lehiaketa
12 urtetik 17ra bitarteko gazteek parte hartu ahal izango dute Oarsoaldeko Euskara Batzordeak antolaturiko egitasmoan. Saria dirua izango da.
Hirugarrena izango da aurtengo Motxiian Eby lehiaketa. 
Motxian Eby bideo-erronka lehiaketa antolatu du, hirugarren urtez, Oarsoaldeko Euskara Batzordeak, eskualdeko 12 urtetik 17ra arteko gazteentzako. Aurten, Sua Enparantza aktore eta dantzariak botako dizkie erronkak Oarsoaldeko gazteei; hamabost egunean behin, bideoz grabatuta gainditu beharreko desafioa izango da. Egitasmoak hilabete iraungo du, beraz, bi erronka izango dira guztira.
Egiteko bakoitza hilaren 14an eta 28an azalduko du gonbidatu bereziak, Motxian Eby-ren webgunean. Erronka baten adibidea izan liteke, besteak beste, abesti bat eman eta horren gainean koreografia bat asmatu behar izatea. Gehienez ere bi minutuko iraupena izango duten bideoak sortu beharko dituzte parte hartzaileek.
Desafio bakoitzeko sariak banatuko ditu Sua Enparantzak, Kuadrillategiko gazteekin. Bideoak edo dena delakoak webgunearen bitartez bidali beharko dira; baldintzak eta lehiaketari buruzko gainerako informazioa, hala nola, epeak, ere bertan topa daitezke. Sariak, bestalde, honakoak izango dira:
- Erronka bakoitzeko bideorik onenari, 150 euroko saria.
- Bi erronkak bukatzean, bideo guztien artean onenari, 200 euroko saria.
- Herri bakoitzeko bideo onenari, 50 euroko saria.
