"Hasi dira liburuxka bat idazten... Teo, udaletxean"
Harrera beroa egin diote gaur, Trintxerpeko Alkateordetzan, bilkide eta pasaitarrek EH Bilduren alkatetzarako hautagai Teo Alberro Bilbaori.
Gaurko aurkezpenaren bukaerako argazki bat. 
Gaur arratsean aurkeztu du Pasaiako EH Bilduren alkate izateko haren hautagaitza Teo Alberro Bilbaok, Trintxerpeko Alkateordetzan. EH Bilduko egungo zinegotzi eta militantzia osatzen duten beste pasaitarrekin batera, bertan izan dira Maddalen Iriarte Okiñena, Gipuzkoako Ahaldun Nagusi izateko hautagaia, eta Errenteria-Oreretako alkate Aizpea Otaegi Mitxelena ere.
Lehen aurkezpena Iraitz Pazos zinegotziak egin du, aretoa bete baino gehiago egin dutenei eskerrak emanez, eta jarraian hitza hartuko zuten kideak aurkeztuz. Alberro bera izan da hurrena, eta lehen aldiz bertaraturikoen aurrean jarri denean, harriduraz eskertu du harrera. Mintzaldian nabarmendu du, dena dela, protagonista ez dela hura, baizik eta publikoa osatu dutenak eta, orobat, pasaitar guztiak.
“Determinazioz” hartu du ardura trintxerpetarrak, “baina, batez ere, sinetsita gauzak beste era batera egin daitezkeela”. Alkatetza eskuratzekotan, ardatz izateko hartu dituen konpromisoen artean honakoak daude: udalaren eta herritar zein eragileen arteko zubiak berreraiki; une honetan etenda dauden alkateordetzak “berreskuratu”; kulturaren eta euskararen arloan inbertsioa handitu; goiko auzo eta alde zaharretan arreta berezia jarri; gazte eta nerabeen etorkizuna eta emantzipazioa; hautatua ez den adinekoen bakardadea; iraunkortasuna…”.
Hitz horien ondotik, aipamena egin dio egungo alkate Izaskun Gomezek bere alkatetzarako hautagaitzaren aurkezpenean irakurritako diskurtsoari: “Hark zioen, inor aipatu gabe, ez dugula merezi azken urteotan Pasaian izan duguna; hain zuzen ere, Izaskun, Pasaiak ez du merezi zure alderdiak eta gobernukideak okupatzen dituzten instituzioen partetik jasan duen abandonua, portutik hasi eta Jaurlaritzara arte”. Iritzi dio herritarrengandik aldendua dagoen gobernantza eredua dela eurena, eta hori dela pasaitarrek “merezi ez dutena”.
“Esan didate zenbait argitaletxetan hasi dela liburuxka bat idazten”, mintzatu da bukatzeko “ezetz izenburua asmatu? Teo, udaletxean”.
Maddalen Iriarte
“Teo, alkatetzan”, zuzendu dio tonu umoretsuan Iriartek, eta bide beretik mintzatu da Ahaldun Nagusirako EH Bilduren hautagaia ere. Esan du ezin dela orain dela mende bat egiten zen gisa berean politika egiten jarraitu, eta funtsezkoa dela, egun, herritarren ondotik hartzea erabakiak.
Gaztetan Trintxerpen bizi izandakoa da hura, eta horregatik aitortu du “plazer handia” dela gaur herrira bueltatu izana. “Badira hauteskundeak gertu ikusi eta euren proiektuak saldu beharrean presaka Pasaiara datozenak; eta bada, eguneroko lanean murgildurik, herritarrekin, eta halako propagandarik egin gabe, lanean jarraitzen duenik ere”. Pasaitarren ondoan lan egitea, esan du, izango dela aurrerantzean ere bilkideen zigilu.
Alberrorekin bat egin eta bere hitza ere eman die Iriartek pasaitarrei urte luzez promestu izan zaizkien proiektuak egi bihurtzeko: “Nire konpromisoa eta nire hitza duzue, zuentzako estrategikoak diren politika publikoak garatzeko; eta gure ahalmen, ahalegin eta ilusio guztia jarriko dugu. Hitza eman diezazueket, eta horretan ez dizuet hutsik egingo”.
