Lopeneko erreka biziberrituko dute
100 metroko eremua da birnaturalizatuko dutena: erreka ertzeko landaretza berreskuratu, eta ibilgua aldatuko dute.
Lezoko Udalak jakinarazi du, URA agentziak Lopeneko erreka biziberrituko duela. Horien helburua ur ibilgua naturalizatu eta erreka ertzeko landaretza berreskuratzea izango dira. 100 metroko bidean egingo dituzte lanak. Bi hilabete inguru iraungo dute, eta horiek bitartean errekaren gaineko oinezkoen pasabide itxita egongo da, segurtasun arrazoiengatik.
Lanak hasteko, auzokonposta gunea desmuntatu eta hainbat zuhaitz moztuko dituzte; horiek ordezkatuko direla adierazi du udalak, eta lorategi berri bat diseinatuko dela. Gainera, lanentzako materiala eta makinentzako eremua hango berdegunean kokatuko denez, hori guztia bere onera itzuliko dute lanak bukatutakoan. Hala, azken emaitza izango da errekaren ertzak leunduko direla (etzanagoak izango dira), eta bihurgunetasuna emango zaiola ur ibilguari. Errepiderantz ematen duen aldean zuhaitzen kopuru handiagoa jarriko dute, errepideko zarataren eragina gutxitzeko.
Udalak zehaztu du material naturalak erabiliko direla birnaturalizazio prozesuan, hala nola, egurra, harria, landare biziak, zuhaitzak eta horrelakoak. Zuhaitzen espezieetan sakonduz, sahatsak, haltzak, lizarrak elorriak eta hurritzak landatuko dituzte.
Lanak udalak eta URA agentziak 2020an sinatutako akordioaren barruan ulertu behar dira. “Hitzarmen honen helburua da Lezoko errekak berreskuratzea, balio naturala handituz nahiz uholde arriskuei aurre eginez”, esan dute udaletik.
