Euskal Herriko irrati libreek topaketa egingo dute herrian
Arrosa Sarearen X. jardunaldiak egingo dituzte martxoaren 4an, Zintzilik irrati librearen eskutik helduko da aurtengo topaketa.
Herreria, Zintzilik Irratiaren egoitza. Euskal Herriko irrati libreek zita garrantzitsua izango dute datorren martxoaren 4an (larunbata da) Errenteria-Oreretan. Izan ere, Arrosa Sarearen X. jardunaldiak egingo dituzte herrian, Zintzilik irrati librearen eskutik helduko da aurtengo topaketa. 20 urte bete ditu jada euskal irrati libreen sareak.
Egitarau oparoa ondu dute. Ondorengoa da:
- 10:00-10:45: Harrera eta gosaria, Zintzilik irratian.
- 11:00: Telekomunikaziorako irrati loturak eta Azura automatizazioa eta kontinuitaterako softwarea izeneko tailerrak emango dituzte Gaztañoko auzo elkartean, Maritxu sareko eta Abailako kide baten eskutik.
- 11:00: Irrati libreen legeztatzea: kontratak eta onurak izeneko hitzaldia eskainiko du Zintzilikeko kide eta zuzenbidean graduatutako Iker Gomezek. Zaragozako (Espainia) Radio Topo lagunen txostena izango du abiapuntu, irrati libreak kudeatzeko lege berria eta ondorioak aztertuko ditu. Mikelazulo elkartean izango da saioa.
- 11:00: Arrosa irratien arteko irratsaioa eta audionobela, Zintzilik irratian.
- 14:30: Bazkaria, Gaztañoko auzo elkartean. Ondoren, bingo musikala egingo dute Arrosa irratien abestiekin.
- 17:30: Poteo musikatua eta agurra.
Bazkarian izena emateko helbide honetara idatzi beharko da, hilaren 28a baino lehen.
