Ihoteen magia, baita ateen aurrean ere
Oiartzungo bi futbol talde nagusiek garaipena lortu dute, mutilek etxean eta neskek Nafarroan. Areto futbolean, partida ikusgarriak jokatu dituzte.
Larunbatean Berriozarren atera zuten hamaikakoa. Ihoteek asteburuan sortu duten magia kirol arlora ere pasatu da. Hala izan da, behintzat, bi futbol talde nagusien partidetan zein areto futbolekoenetan.
Gizonek Ugaldetxon jokatu zuten, Mutrikuren kontra. Jokoaren gidaritza etxekoek eraman zuten, baina bisitariek atzealdea ederki harresitu zuten. Atsedenaldiaren aurretik iritsi zen oparian ez zuten hutsik egin oiartzuarrek: penalti bidez aurreratu ziren.
Bigarren zatia hasi bezain pronto sartu zuten bigarrena, eta hortik aurrera gauerako indarrak gorde zituzten oiartzuarrek, partida erosoa izan baitzen.
Neskak, baldintzen kontra
Emakumeen talde nagusiaren kasuan, Berriozarren zelaia bisitatu zuten, eta hasiera duda-mudatsua izan zuten. Nafarrak gogor aritu ziren, eta lehen zatian, kiroltasunetik ezer ez zuen ekintza batean Miren kapitaina hesien kontra bota zuten.
Aldatu egin behar izan zuten, eta egoera horrek oiartzuarrak jokotik kanpo utzi zituen. Atsedenaldira 1-0 joan ziren.
Bigarren zatian, baina, intxixuak, sorginak eta basandreak ostiralean plazara jaitsi ziren bezala atera ziren zelaira, eta hiru gol lortu zituzten (Ixiarrek bi eta Rebecak bestea).
Laugarren postura igo dira, eta datorren asteburuan hirugarren sailkatuaren —Burgosen— bisita jasoko dute oiartzuarrek.
Areto futbolean, bikain
Areto futboleko Lehen Mailako taldeak liderraren kantxa bisitatu zuen. Teep Tolosala ez zen arerio izan; inauteriak aurreratu zituztela zirudien.
Oiartzuarrek bost gol sartu zizkieten atsedenaldian, eta partidaren bukaeran 1-10 emaitza ikusgarria adierazten zuen markagailuak.
Miren Tabernak gol batengatik irabazi zuen, baina ikusgarria izan zena markagailuaren iraultzea izan zen. Lehenengo minutuan aurreratu ziren oiartzuarrak, baina Makax Gorka Margoak taldea aurretik iritsi zen atsedenaldira (1-2), aukera gutxiago sortu arren.
Aldea handitu zuten añorgatarrek, eta minutuak aurrera joan arren, oiartzuarrek ez zuten golik lortzen. Partida bukatzeko ordu laurden falta zenean, atezain-jokalaria atera zuten oiartzuarrek, eta horrela lortu zituzten beste hiru gol. Eta hiru puntu.
FUTBOLA
Emakumeen Lehen Nazional Maila
- Berriozar — Oiartzun: 1-3.
Gizonezkoen Ohorezko Erregional Maila
- Oiartzun – Mutriku: 2-0.
Emakumeen Euskal Liga
- Oiartzun B — Pauldarrak: 2-0.
Gizonen Gorengo Maila
- Oiartzun B – Touring: 0-1.
Emakumeen Gorengo Maila
- Oiartzun C — Hondarribia: 0-2.
Mutilen Gazte Mailako Nazional Maila
- Beasain — Oiartzun: 4-0.
Mutilen Gazte Mailako Gorengo Maila
- Kostkas – Oiartzun: 2-1.
Mutilen Gazte Mailako Lehen Maila. Kopa.
- Orereta Kafea — Oiartzun C: 1-5.
ARETO FUTBOLA
Gizonen Gipuzkoako Lehen Maila
- Teep Tolosala — Oiartzun: 1-10.
Gizonen Gipuzkoako Bigarren Maila
- Miren Taberna — Makax Gorka Margoak: 4-3.
