[Bideoa eta argazki galeria] Elurretan gozo
Xoxolurrek elurretarako irteera egin du asteburuan, gozo. Hurrengoa Eskolarteko Ibilaldi Neurtua izango dute, Irunen.
Igandean, Lezoko Xoxolur Mendi Taldekoak elurretara joan ziren urteko bigarren irteera izan zenean. Aralar alderako bidea hartu zuten elementu zuriarekin bat egiteko. 25 bat lezoar bildu ziren txangora, taldekideek adierazia dutenez oso giro onean. “Egun eguzkitsua izan zen, eta elurra ere gozatzeko moduan izan zen”, esan dute.
Irteeran izan zirenetako batzuk elurretan jolasean zebiltzan bitartean, beste hainbatek ez duten aukera galdu Beloki gaina (1.276 metro) bere egiteko. Bakoitzak bereak eginda, Berastegira jaitsi ziren, han bazkaldu, eta beti bezala, herrian jolasean aritzeko, kasu honetan, berastegiarrekin ere bai.
Xoxolurren hurrengo irteera martxoaren 12an da. Irunen urteroko Eskolarteko Ibilbide Neurtua egingo dute, aurten 34.enez. Iaz, Lezon antolatu zuten jarduera hori.
Jarraian, igandeko hainbat irudi, eta hitzez adieraz ezin daitekeen une gozo bat: lezoarrak Aralarren elurretan irristaka, bideoan.
