Oiartzun Sortzetiko Kardiopatien Nazioarteko egunarekin bat
Sortzetiko Kardiopatien Nazioarteko eguna da, eta Oiartzungo udaletxearen balkoian puxika gorriak jarri dituzte eguna aldarrikatzeko.
Otsailaren 14a Sortzetiko Kardiopatien Nazioarteko eguna denez, Oiartzungo Udalak puxika gorriak jarri ditu udaletxeko balkoian.
Sortzetiko kardiopatiak bihotzeko malformazioak dira, gizartean eragin handiena duen gaixotasunetako bat da. Gipuzkoan, Bizkaian eta Araban sortzetiko kardiopatia duten 175 haur inguru jaiotzen dira urtean.
Jaiotzear dagoen edo jaio berria den haurrak gaixotasuna duela entzuteak eta hilabete gutxira bihotzeko ebakuntza egin behar diotela jakiteak gurasoengan eragin handia izaten du. Bihotzeko arazoak izateaz gain, haurraren eta familiaren esparru askotan eragiten du sortzetiko kardiopatiak: emozionalki, hezkuntza etapan, familian edota garapen neurologikoan, beste hainbaten artean.
Bihotzez elkarteak, gaixotasun hau ezagutarazteko lana egiten du, baita hori bizi duten familiei babesa, informazioa eta aholkularitza eskaintzean ere. Babesa adierazteko, Oiartzungo Udalak bat egin du haiekin balkoian puxika gorriak jarriz.
