Zabalik da Mendiola bidea berrurbanizatzeko enpresen lehiaketa
Udalak ia 100.000 euro bideratuko ditu Trintxerpeko bidean irisgarritasuna hobetzera. Proposamenak martxoaren 2ra arte aurkez daitezke.
Kalteturiko bidea berregokitu eta altzairuzko pantailen bidez egonkortuko dute. 
Trintxerpeko goialdean dagoen Mendiola bidea berrurbanizatzeko obrak kontratatzeko espedientea onetsi berri du Pasaiako Udalak. Erabaki horrekin, zabalik da, jada, 99.455 euroko (BEZa barne) aurrekontuarekin, proposamenak aurkezteko epea. Martxoaren 2a izanen da horretarako azken eguna.
Obrak egiteko interesa duten enpresek euren proposamenak aurkezteko epea igarota, bat hautatuko du udalak, eta onuradunak 12 asteko epea izango du lanak burutzeko. Egin beharreko obrak honako hauek dira: ezpondari eusteko eta kaltetutako bidea berregokitzeko jarduketak.
Xehetasun gehiago eman ditu udalak: lurrean sartutako altzairuzko pantailen bidez sostengatuko dute pasabidea; alde batetik, eskailera-tarteei eusteko, eta bestetik, ezponda zeharkatzen duen pasabideari eusteko. Azkenik, ezpondaren eta pasabidearen arteko elkargunean areka bat egingo da, ezpondatik jausitako ura biltzeko.
Udalak ziurtatu du obra berriei esker oinezkoen bidea “irisgarriagoa” izango dela, pasabidearen bi muturretan bina eskailera maila desagerraraziko baitituzte, eta maila berri bat eraikiko da dauden eskailerekin lotzeko.
