'Egunkaria'-ren itxiera gogora ekartzeko bost ekitaldi antolatu ditu Kilometroak-ek
Astelehenean 20 urte beteko dira 'Euskaldunon Egunkaria' itxi eta hainbat lagun atxilotu zituztela. Gertaera eta horrek sortutako "sumindura" gogora ekartzeko aste osoko egitaraua antolatu du Kilometroak 23k.
Datorren astelehenean (hilak 20) 20 urte beteko dira Guardia Zibilak Euskaldunon Egunkaria itxi eta hainbat lagun atxilotu zituela, epaile baten aginduz. Gertaera hori gogora ekartzeko asmoz, bost ekitaldi antolatu ditu Kilometroak 23k, astelehenean hasi eta hilaren 24an (ostirala da) bukatuko dituzte horiek. Berria hedabidearekin elkarlanean antolatu dute aste osoko egitaraua. Egunkariatik Berriara, 20 urte izena jarri diote egitasmoari.
Ikastolako iturrien arabera, “erabateko zentzua du Egunkariari, haren itxieraren ondoren sortutako prozesuari eta ondoren etorri zen Berriari Orereta Ikastolak egindako aitortzak, enbor beretik sortuak baitira, euskalgintzaren bihotzetik”. Ikastolan eragin zuzena izan zuen gertaerak, 2003ko otsailean atxilotu baitzuten garai hartako lehendakaria.
Ondorengoa da datorren asterako ondu duten egitaraua:
- Hilak 20 (astelehena): Imanol Murua Uria kazetari eta EHUko irakasle eta ikertzaileak Egunero behar genuen liburua aurkeztuko du. Euskaldunon Egunkariako kazetaria izan zen Murua, eta Eguneroren sortze prozesuan eta bilakaeran ere aritu zen. Liburuaren sortze prozesuari eta edukien inguruan ariko da Lekuona Fabrikan, 19:00etan. Bertan hainbat auzipetu izango dira bertan.
- Hilak 21 (asteartea): Egun oro hedabidea plazaratuko dute ikastolako DBH 2. mailako eta Oiartzo Batxilergoko ikasleek, “bere tamainan mugarri izango den beste hedabidea”. Egunkariaren itxieraren eta emandako erantzunaren inguruko informazioa jasotzen ibili dira ikasleak. Eguneroren tankerako diseinua izango duela aurreratu dute. 5.000 ale inguru kaleratuko dituzte.
- Hilak 22 (asteazkena): Paperezko hegoak dokumentala proiektatuko dute Niessen aretoan, 19:00etan. Egunkariaren itxiera azaltzeko egindako lana da, 2021ean estreinatutakoa, Samara Velte eta Josu Martinezek egina. Itxiera eragin zuen polizia operazioaren atzean zer egon zen ulertzeko gakoak ematen ditu bikoteak. Proiekzioaren ondoren hainbat auzipetuk solasaldia egingo dute bertaratutakoekin.
- Hilak 23 (osteguna): Arkaitza, Desira eta Zuzen tabernen parean, txandaka, Egunkariaren itxieraren gaia landuko dute, “modu artistikoago eta sortzaileago batean”. Lehenik, Axun Ertzibengoa eta Arantxa Iraola kazetariek itxieraren gaineko gogoetak partekatuko dituzte, Arkaitz Minerek biolina jotzen duen bitartean. Entzundakoa erantzungo du musikariak. Arkaitzan 19:00etan ariko dira; Desiran 19:30ean; eta Zuzenen 20:00etan. Bigarrenik, Joxe Mari Karrere istorio kontalaria Ibai Maritxalar ilustratzailearekin batera ariko da. Egunkaria babesteko gizartean sortutako mugimenduaz ariko dira, aipatutako hiru tabernetan (Desiran 19:00etan; Zuzenen 19:30ean; eta Arkaitzan 20:00etan). Hirugarrenik, Aitor Zorzanok eta Gema Inesek musika saioa emango dute, Zuzenen 19:00etan, Arkaitzan 19:30ean, eta Desiran 20:00etan.
- Hilak 24 (ostirala): Kantu bat gara ikuskizuna taularatuko dute Lekuona Fabrikan, 19:30ean. Jon Maia Soria bertsolariak bidaia bat proposatuko die herritarrei, kantez bidez. Euskal kulturaren, historiaren eta identitatearen ikuspegi berezi bat bilatzen du kantutegi honetan Maiak. Saio honetan, gainera, Egunkariaren itxierari ere erreferentzia egingo dio, aparteko izaera emango dio emanaldiari. Sarrerak hemen eskura daitezke jada.
- Hilak 24 (ostirala): Esmalteriako Ostiraletan izeneko saioen barruan, Egunkariaren itxieraren eta Berriaren sorreraren inguruko saio berezia antolatu dute hileko azken ostiral horretarako. 17:00etan bilduko dira haur eta gurasoak.
