Eskertza Eguneko egitaraua prest du Biyurrieneak
Biyurrieneak eskertza hirukoitza egin nahi du egun horretan. Horrez gain, herriko gazteak saretzen joateko ekitaldia izango da.
Gazte Eguneko giroa udaberri hasieran bizitu nahi dute. Eskertza Eguna izango da martxoaren 18koa. Biyurrienea aleka aritu da larunbat horretan egingo diren ekitaldien berri ematen, Instagram bidez, eta bart egitarau osoa partekatu zuten (behean ikusi).
Eskertza Eguna prestatzen hilabete batzuk daramatzate, eta esker emate hirukoitza izango da. Biyurrieneak azaldu duenez, orain arte antolatu dituzten ekintzetan txandak egin dituztenak ekitaldi horietan “esku bat bota” dutenek jasoko dute aitortza.
Hori alde batetik. Bestetik, jardueretara “besterik gabe” hurbildu direnei ere aitortza egin nahi diete. Hirugarren taldea, berriz, xanistebanetako Gazte Eguna antolatzen hamaika urte daraman “talde motorra” da.
“Herrigintzan musu truk” aritzea eskertu nahi diete, eta beraiek egindako lanari esker Biyurrienea dena dela aitortu nahi diete, “garrantzitsuak” izan direlako.
Gainera, gazteak “saretzen” jarraitzeko aukera bat izango da Eskertza Eguna. “800dik gora lagun elkartu ohi gara xanistebanetako bazkarian, baina horrez gain, ez dugu ekitaldi jendetsurik egiten. Horretarako aitzakia bat ere izango da Eskertza Eguna”, azaldu dute Biyurrieneko kideek.
Sarrerak salgai daude Miren eta Sorgin tabernetan.
Egitaraua
- 10:00etan: Ginkana, plazan.
- 13:00etan: Trikipoteoa.
- 14:00etan: Eskertza hitzak.
- 14:30ean: Bazkaria.
- 16:30ean: Bingo musikatua.
- 18:00etan: Elektrotxaranga, Elektropottotte taldearekin.
- 22:00etan: Kontzertuak: Kilimak eta Dj Fresamorango-rekin.
