Portu agintaritzak 2022ko datuen berri eman du
Iazko jarduera, 2021arekin alderatuta, positiboa izan ez zen arren, Telleria eta Candelario zuzendariek pandemia aurretiko kopuruen gainetik daudela nabarmendu dute.
Pasaiako Portu Agintzaritzako (PPA) presidente Jokin Telleria eta zuzendari David Candelario portuko 2022ko jardueraren balantzearen berri eman dute.
Portuak, oro har, hiru milioi tonako trafikoa bildu zuen iaz, 2021ean baina % 6 gutxiago, baina pandemia aurreko zifraren gainetik. Kopuru horren % 55,77a burdingintza eta metalgintza merkatuak mugitu zuen.
Hazkunde handiena trafiko elementu eta ibilgailuen esportazioak bizi izan zuen: 2021eko kopuruekin alderatuta, % 17 igo zen trafikoa. Noatum-UECC terminala izan zen kudeaketaren arduradun.
Inportazio eta esportazioen jatorriari erreparatuta, batik-bat Herbeheretatik (% 19,67), Suediatik (% 16,37), eta Erresuma Batutik (% 12,28) heldu ziren inportazioak. Esportazioen helmuga nagusiak, ordea, Belgika (20,95) eta Erresuma Batua (% 34,02) izan ziren.
Hortaz guztiaz gain, zuzendariek portu agintaritzak 45,8 milioi euroko inbertsioak lortu dituela azpimarratu dute, datozen bost urteetarako. 2022an, 5,2 milioi euroko inbertsioak egin zituzten, eta Iberdrolaren zentral zaharraren lur zatiaren zoladura konpontzera, arrantza lonjak berritzera, edo kaiak sendotzera bideratu zituzten.
