[Galeria eta bideoa] Sanjuandarrak ala sabanarrak?
Donibane Afrikako herrialde batean bilakatu da, askotariko kulturak bildu dituenak. Arratsaldean jarraituko dute ekitaldiek.
Sabanako eguzkiak jo du gaur Donibanen. Donibane, Pasaiako barruti beharrean, Afrikako herrialde bilakatu da asteburu honetan. Gaur goizean desfilea egin dute festaren epizentro den zaharren egoitzatik Meipiraino. Ile-apaindegi baten kanpoaldean zegoen elefanteak eskertu du bere harrapakari erreala Abu Dhabin izatea.
Sabanan aurki daitezkeen animalia eta biztanleez gain, Afrika iparraldeko turbanteak zein “Xanjiptoko” faraoi eta bestelakoak ikusi ahal izan dira. Kolonizatzaileek ez dute hutsik egin: esploratzaileak, dama dotoreak edo Kongora joan nahi zuen Tintinek.
Argentinarra izan arren, King Africa bera ere Donibanen izan da, bere ile bitxi eta ahots are bitxiagoarekin.
Lehenengo desfilearen ondoren, dantzarako tartea izan dute. Plazaraino joan dira, eta arratsaldean, berriro ere, zahar eta gazte elkartuko dira plazatik Meipirako desfilea egiteko. Ondoren dantzatzeko aukera izango dute. Honakoa da egitaraua:
- 18:00. Desfilea, plazatik Meipira.
- 19:00. Mozorro lehiaketa, Meipin.
- Gero, Gramola de la Anita, Meipin.
- 22:30. Dantzaldia, Jabisamper dj-arekin.
