[Galeria] Oarsoirrien sagak jarraitutasuna izan du
Oarsoirriak-ek deituta, desfilea egin dute gaur goizean hiriguneko txoko nagusienetatik. Xanti eta Maialenek ez dute hutsik egin.
Inauteriak ospatzeko gogoa zegoen Errenteria-Oreretan, eta atzeman da. Gaur eguerdian, Oarsoirriak-ek deituta, desfilea egin dute hiriguneko txoko nagusietan geldialdiak eginez.
Merkatuzarretik atera, eta Xabier Olaskoaga eta Foru plazetan geldialdiak egin dituzte, Koldo Mitxelena ikastetxeko patioan geldialdia egin ondoren, Herriko Plazan bukatzeko.
Familia ugarik bat egin dute kolorez betetako zitarekin. Foru Plazan eta Niessenen familiek prestatuta zeuzkaten koreografiak egin dituzte, eta inguruan begira aritu direnak gonbidatu dituzte parte hartzera. Datorren urterako gonbita egin dute, gehiago izan daitezen.
Festa bereziak direla eta, Xanti eta Maialen erraldoiek ez dute hutsik egin. Haiek ere mozorrotuta agertu dira, giro ederra jarri dute, txikienen begiradapean.
Herri bazkaria egiten ari dira momentu honetan Merkatuzarren, eta arratsalderako beste hainbat ekitaldi —behean ikusi— antolatu ditu Inauteriak antolatzeko ardura hartu duen batzordeak.
Aurtengo gaia sagak direnez, festaren jarraitutasunak ez du etenik izango. Bihar, adibidez, karrozen desfilea egingo dute.
- 16:30-19:30: Jokoak haur eta helduentzat, Gernika, Lehendakari Agirre eta Xabier Olaskoaga plazetan.
- 17:30: Deiadar txaranga erdigunetik ibiliko da.
- 18:00: Sagen Inauteria Photocalla izango da herriko plazan.
- 18:30: Disko festa, Zumardian.
