Bihar arratsaldean odola ematera deitu dute
Abenduan 32 emaile bakarrik hurbildu ziren odola ematera. Kopurua handitzera animatu dituzte oiartzuarrak.
Odola emateko txanda eskatu beharko da, antolatzeko.
Oiartzungo odol-emaileek zita izango dute bihar —asteartea, hilak 21— arratsaldean. Manuel Lekuona bibliotekan elkartuko dira, 16:30etik 20:10era bitartean.
Aldez aurretik txanda hartu beharko dela jakinarazi dute odol-emaileen elkartekoek. Horretarako, 943 007 885 edo 943 317 091 telefono zenbakietara dei daiteke, biharko 08:00etatik aurrera.
Odol-emaile berriak behar dituztela berretsi dute. Gainera, abenduko odol-emate saioa “kaskarra” izan zela gaineratu dute, 32 lagun besterik ez baitziren joan. Horietatik lau izan ziren lehen aldiz eman zutenak.
Honakoak izan ziren orduko datuak, odol-taldeetan sailkatuta:
- O+: 13.
- O-: 7.
- A+: 8.
- A-: 2.
- B+: 2.
- B-: 0.
