Azken hamar urteetan egindako ibilbidea ospatuko du Ernaik
Oreretatik Ari Gara izeneko eguna antolatu dute datorren martxoaren 4rako. Ospakizun eguna izan arren, antolatzeko eguna ere izango da.
Ernai gazte antolakundeak hamar urte beteko ditu aurten. Herriko gazteekin batera “hamarkada batean egindako ibilbidea” ospatuko dutela iragarri dute, datorren martxoaren 4an (larunbata da) hain zuzen. Oreretatik Ari Gara izena jarri diote egun handiari.
Ospakizun eguna izan arren, antolatzeko eguna ere badela aldarrikatu du Ernaik, “testuinguru sozioekonomiko eta politiko nahasi batean kokatzen baikara”. Horregatik, ospakizunetatik harago, ideia, kezka, borroka eta aldarriei forma eman eta Euskal Herri “aske, sozialista eta feminista” eraikitzeko horrelako egun bat antolatzea beharrezkotzat jo dute gazteek.
Poteo animatu batekin hasiko dute eguna (19:00etan), Sindi tabernatik abiatuko dira, herriko trikitilariek lagunduta. Ondoren, 20:00etan hain zuzen, Landaren kontzertu akustikoa eskainiko dute herriko hainbat gazte sortzailek. Ekitaldiaren ondoren (21:15ean), afaria egingo dute Landare elkartean. Eguna biribiltzeko, 23:30etik aurrera, Sindrome Norte, Bide Batez Triki Taldea eta DJ Expuelak dantzan jarriko ditu gazteak, Zabala Enea II gaztetxean.
Afariko txartelak dagoeneko eskura daitezke, zazpi euroan, Sindi eta Landare tabernetan.
