Beraungo erretiratuen elkarteko taberna-jatetxea, lehiaketara
Lehiaketara atera berri dute taberna-jatetxearen ustiapena. Bi urteko iraupena izango du kontzesioak, kontratua formalizatzen denetik zenbatzen hasita.
Udalak jakinarazi berri du lehiaketara atera dutela Beraungo erretiratuen elkarteko taberna-jatetxearen ustiapena. Bi urteko iraupena izango du kontzesioak, kontratua formalizatzen denetik zenbatzen hasita, eta beste bi urte luzatu ahalko dela aurreratu du udalak. Hartzaileak zerbitzuaren ustiapenetik lortzen dituen diru sarrerak jasoko ditu, kontraprestazio gisa.
Taberna-jatetxeko arreta nagusiko taldea jubilatuak izango dira, baina halere, eskaintza publiko orokorrari zabaldu dakioke eskaintza, betiere klubeko jardueretan eragozpenik sortzen ez badu.
Urteko gutxieneko kanona 1.200 eurokoa izango da, eta udalak bere gain hartuko ditu uraren, argiaren, gasaren, wifiaren eta alarma zerbitzuaren gastuak.
Udalak gogorarazi du orain dela gutxi “obra garrantzitsua” egin dutela taberna-jatetxea “birmoldatzeko”. Instalazioa ekipatuta dagoenez, ez da beharrezkoa hasierako inbertsiorik egitea.
Martxoaren 20ra arte aurkeztu daitezke eskaintzak. Baldintzak eta gainontzeko dokumentazio guztia, lotura honetan kontsulta daitezke.
