'Gamer Gela' bihurtuko da Antxoko Kultur Etxea larunbatean
Bideo-jokoekin euskaraz gozatzeko aukera eskainiko diete LH 5-etik DBH 2-ra bitarteko gazteei. Saio bera San Pedron ere egingo dute martxoan.
Trintxerpeko alkateordetzan izandako saio baten argazkia. 
Datorren larunbatean, hilak 25, Gamer Gela bihurtuko da Pasai Antxoko Kultur Etxea. Game Erauntsia elkarteak euskarazko bideo-jokoak ezagutzeko aukera emango die hala nahi dutenei.
17:00etatik aurrera, euskaratutako bideo-jokoak erakutsi eta horiekin jokatzeko aukera izango da. Horrez gain, eztabaida talde bati esker, joko horietan aritzeko erabiltzen den hizkuntzari buruzko gogoeta egitera bultzatuko dituzte bertaraturikoak. Ordu eta erdiko saioa izango da.
Pasaiako LHko bosgarren eta seigarren mailako eta DBHko lehen eta bigarren mailako ikasleentzako diseinatutako jarduera da. Sarrera doakoa izango den arren, gonbidapena online hartzeko eskaera egin dute udaletik, edukiera kontuengatik. Hemen klik eginda erreserba daitezke horiek.
Udal iturrietatik ziurtatu dute Antxon izango den saio hau San Pedron ere egingo dutela martxoaren 11n. Hedabide honek xehetasun gehiago dituenean emango du horien berri.
