[Bideoa eta argazki galeria] "Trapujale errudun!"
Atzo bukatu ziren Lezoko inauteriak. Espero zitekeen epaiak, ez zituen lezoarrak asko harritu, horren kontra egon arren.
Trapujaleren lagunak gogor saiatu ziren. Baina ezin. Atzo arratsean Trapujale berriz ere errudun izendatu zuten, ustez hainbat ardi lapurtu eta hik, eta inauterika bitartean beste hainbat triskantza egiteagatik. Epaileak (ustez, neutroa) Zirikuen eta Marinazkaneren testigantzei zilegitasuna eman zien, hainbat herritarren iritzi eta datuen kontra. “Trapujaleren lagunek ez dute balio lekuko bezala”, esan zuen epaileak, lezoarren kontrakotasun oihu eta txistu artean. Emaitza: Herio Bidaia egitera, eta igitaiaz burua moztera kondenatu zuten Trapujale. Erre egin zuten haren burua. “Lasai, burua moztu didate, baina Trapujaleren inauteri espiritua lezoarren artean dago. Itzuliko naiz!”, esan zuen heriotzera kondenatu izan berriak. Horrela bukatu ziren atzo Lezoko inauteriak.
Askotariko inauteriak izan dira Lezokoak, baina zerbait nabarmentzekotan, parte hartzaileak izan dira. Jendea kalera atera da, pozik eta gustura. Egin diren ekitaldi gehienekin bat egin dute lezoarrak, Trapujaleren espiriturarekin bat egin dute 35.enez.
Jarraian, atzoko epaiketaren hainbat argazki eta bideoa.
