Bilboko NATOren kontrako manifestaziora joateko autobusak antolatu dituzte
Datorren martxoaren 11n Bilboko kaleak beteko dituzte, 'NATO eta Europar Batasuna ez, Euskal Herria antiinperialista' lelopean. Landare tabernan eman daiteke autobuserako izena.
![](https://oarsoaldea.hitza.eus/site/files/2023/02/dsc03662.jpg)
Datorren martxoaren 11n (larunbata da) manifestazioa egingo dute Bilbon, Askapena erakundeak, NATO eta EBren Aurkako Herri Ekimenak eta Bardenasya asanbladak deituta, NATO eta Europar Batasuna ez, Euskal Herria antiinperialista lelopean. Deialdi horrekin bat egin dute hainbat herritarrek, eta bertaratzeko autobusak antolatu dituzte. Errenteria-Oreretako Landare tabernan izena eman daiteke dagoeneko, martxoaren 9a (osteguna da) izango da horretarako azken eguna. Eskualdeko herritar orori luzatu diote deia.
“NATO buru duen azken ofentsiba inperialistari aurre egiteko eta Euskal Herri antiinperialistaren aktibazioa aldarrikatzeko” baliatuko dute manifestazioa. Mobilizazioaren deitzaileek beharrezkotzat jo dute “burgesiaren aparatu politiko guztiak suntsitzea, neurri ekonomiko eta errepresiogileei eta gerra inperialistei aurre egin nahi badiegu behintzat”. Herri langileon borroka aldarrikatuko dute, eta herritarrak batzearen garrantziaz aritu dira, “inperialismoaren azken erasoaldiari aurre egiteko”. Bide batez, Donbasseko errepublikekiko “elkartasuna” adierazi dute.