Kalera aterako da Elkarrekin Errenteria, "programa parte hartzailea egiteko asmoz"
Udal hauteskundeetako programa herritarrekin batera osatu nahi dute. Taldeak informazio mahaiak jarriko ditu kalean bihar.
Maiatzeko udal hauteskundeetara eramango duten programa herritarrekin batera osatu nahi du Elkarrekin Errenteriak, programa hori “parte hartzailea egiteko” asmoz. Kalera aterako dira bihar (hilak 24), informazio mahaiak jarriko dituzte 17:00etatik aurrera Kapitanenea eta Biteri kaleen artean. Interesa duten herritarrek proposamenak egin ditzakete. “Herritarrei eta gizarte zibilari entzuteko, haien kezkak ezagutzeko eta haien beharrei arreta emateko” baliatuko dute biharkoa, “haien arazo eta eskaerei irtenbide eraginkorrak eskaintzeko”.
Koalizioko militanteak izango dira mahai horietan, eta hautetsontziak jarriko dituzte. Bertan jasotakoa aztertuko dutela dio taldeak, “hauteskunde programan sartu ahal izateko”. Eskuorriak ere banatuko dituztela jakinarazi dute. Bertaratu ezin dutenek, baina, eskuorri horietan agertzen den QR kode baten edo helbide elektroniko baten bidez euren kezka eta proposamenak helarazi ditzakete.
Taldekoek argi dute, herritarren ideiak batuta, “hiri bizigarriagoa lor daitekeela”. “Guztion artean bat eginez gero, hiri demokratikoagoa lor daiteke, herritarrek beren burua erakundeetan ordezkatuta ikusten duten, gardentasunean eta herritarren benetako partaidetzan oinarritutako kudeaketagatik abiatuta. Elkarrekin bat eginez, azken batean, helburu hau lor daiteke: guztientzako hiriak eraikitzea, non haurren, gazteen eta haien adinekoen alde jardungo den, eta zaintzari lehentasuna emango zaion”, esan dute, azkenik.
