[Eduki babestua] Zortzi auzoak bidegorri bidez elkartuta
Gurutze-Elizalde bidegorria zabaltzear da, eta horrekin, Gipuzkoako sare osoenetakoa izango du Oiartzunek. Ez da, ordea, mugikortasun iraunkorra bermatzeko udalaren egitasmo bakarra.
Agustin Lekuona Hirigintza zinegotzia eta Eneritz Arbelaitz Mugikortasunekoa, Gurutzeko bidegorriaren zati batean. Aurki zabalduko dute. Argazkia: HITZA Zabaltzear da Gurutze eta Elizalde auzoak lotuko dituen bidegorria. Beraz, herriko zortzi auzoak aurki elkar batuta izango dira bidegorri bidez, herriko sarea oso-osorik osatua izango delarik. Orotara, azken zati hori egiteko 635.000 euroko inbertsioa egin da: Gurutzeko aparkalekutik abiatu, Malkorra hotelaren atzealdetik Fraileen bideraino iritsi, eta handik Legarre kalera ailegatuko da herriko mugikortasuna arras hobetuko duen 2,5 kilometroko azpiegitura. Ibilbide osoa argiztatu du udalak.
Herriko bidegorrien sareak 14 kilometro ditu osotara. Gipuzkoan herri gutxik dute Oiartzunek adina bidegorri kilometro. Eneritz Arbelaitz Mugikortasun zinegotzi eta alkateordeak, eta Agustin Lekuona Hirigintza zinegotziak nabarmendu dute udalaren helburuetakoa dela herri barruan mugikortasun osasuntsua bultzatzea. «Ibilgailuen erabilera eta hauek sortzen duten kutsadura gutxitzeko, aukera ezberdinak eskaini nahi izan ditu udalak azken urte hauetan egindako proiektuekin». Horren ondorioz, bidegorrien eta oinezko bide berriekin, herritarrek aukera dute auzoen artean oinez edo bizikletan joan-etorrian aritzeko. Baina ez hori bakarrik.
Izan ere, udalaren zereginen zerrendan dago aisia esparruaz harago doan mugikortasun iraunkorra sustatzea. Hau da, aktuazio soilak baino, mugikortasun plan integrala du esku artean udalak. Bide horretan, ikastetxeetara, lanera edo erosketak egitera ere oinez joan daiteke herrian, eta hori egin dezaten eskatu diete oiartzuarrei. Eskaerak, ordea, aurretik egindako lana du: «Oiartzuarrek hori egin dezaten espaloi berriak egin ditugu azken urteetan, eta zenbait errepidetan ibilgailuen noranzkoak ere aldatu dira oinezkoen segurtasuna handitzeko edo bizikletentzat bide berriak egiteko. Herriko punta batetik bestera oinez edo bizikletan erraz joateko aukera eman dugu». Gainera, auzoguneetan ere oinezkoei lehentasuna emateko hainbat hirigintza lan egin dira: Altzibarren egindakoak dira horren adibide. Aldi berean, Done Eztebe plazatik Landetxe aldera doan Yon Oñatibia etorbidea ere oinezkoen eremu izango da aurrerantzean.
Aukera gehiago
Oiartzuarren mugikortasuna bermatzeaz gain, horretarako dauden aukeren berri zehatz ere ematea du xede udalak. Zeregin horretarako hainbat baliabide prestatzen ari da. Hala, bidegorri sarearen mapa osoa eta egin daitezkeen ibilbideak jasotzen dituen webgunea nahiz sakelakoentzako aplikazioa maiatzean aurkeztuko ditu prest izatea du asmo. «Arditurriko Bide Berdearen eta bidegorriko adar guztien geolokalizazio mapa izango dituzte, eta bidean zehar dauden gune interesgarrien informazioa emango dute».
Mugikortasunaren gaia, ordea, hirigintza lan zehatz batzuetatik askoz harago doa. Erantzun integrala eman dio horri Oiartzungo Udalak. Adibidez, Xorrolaren eta Taxibusaren ordutegiak zabaldu dira, larunbatetan nahiz data berezietan ere (xanistebanetan, adibidez) arrakastaz martxan direlarik.
Ildo horretatik, Oiartzun-Donostia Ekialdebus zerbitzuan eragin nahi du udalak, eta Gipuzkoako Foru Aldundiari bi linea berri jar ditzala eskatu dio: bata Oiartzun-Donostia autobus zuzena (egun E02 lineak egiten duen bidea, baina geldialdirik gabe), eta bestea Oiartzun-Donostiako Ospitaleak. «Aldundiak erantzunik eman ez badu ere, biak jartzeko lanean jarraituko dugu».
