Koalizioan aurkeztuko dira Ezker Anitza-IU, Podemos Ahal Dugu eta Alianza Verde
Akordioa itxita, Xabier Sanchez Agirregomezkorta hirugarren izango da koalizioak maiatzeko hauteskundeetara aurkeztuko duen zerrendan.
Akordioa itxita, Xabier Sanchez Agirregomezkorta hirugarren izango da koalizioak maiatzeko hauteskundeetara aurkeztuko duen zerrendan. Ezker Anitza-IU, Podemos Ahal Dugu eta Alianza Verde koalizioan aurkeztuko dira maiatzeko udal hauteskundeetara, eta jakinarazi dutenez elkarrekin aurkeztuko duten hautagaitzan hirugarren zerrendakidea izango da Xabier Sanchez Agirregomezkorta. Egun, Gazteria zinegotzia da Sanchez. Haren ustetan, egindako lanarekin jarraitu beharra dago, “Errenteriako gazteek beren bizi proiektua hemen garatu ahal izateko etorkizuneko herria izaten jarrai dezan”. Sinistuta dago, erakundeetatik, eta zehazki, udaletatik “herritarrengandik gertuen daudelako” eragitea dagoela, “gauza garrantzitsuak egin, jendearen arazoak konpontzeko”.
Bultzatu beharreko ildoak ere nabarmendu ditu Gazteria zinegotziak, eta horien artean, sare komunitarioak eta gazteentzako etxebizitza komunitarioa jarri ditu lehen lerroan: “Azken hori gazteen emantzipazioa bultzatzen duen proiektu benetan interesgarria da, eta gainera, emantzipazio eta partaidetza politiketan sakontzea ahalbidetzen du”.
Errenteria inguruko udalerrien “kultur erreferente” izaten jarraitzea ahalbidetuko duten politikak sustatzea ere helburu jarri du Sanchezek.
Maiatzeko hauteskundeetarako hautagaitzari “ilusioaz eta erantzukizun handiz” aurre egingo diola esan du azkenik, “jendea erdigunean jartzen duen Hiri antolamenduko Plan Orokor baten bidez bizigarriagoa izango den eta etorkizunerako proiekzioa izango duen udalerri baten alde lanean jarraitzeko”.
