Izaskun Gomez: "EH Bildu buru denean, dena hitzetan gelditzen da"
PSE-EEko ordezkariak Trintxerpen izan dira. "EH Bildu eta EAJk erabakitzeko eskubidearen gaia berrartu nahi dute; hor ez gaituzte aurkituko".
Jose Ignacio Asensio, Izaskun Gomez eta Iñaki Arriola, atzo, Trintxerpen. 
Herreratik Trintxerperako pasabidean agerraldia egin zuen atzo Pasaiako alkate Izaskun Gomezek, PSE-EEko Gipuzkoako idazkari nagusi eta gaur egungo Gipuzkoako diputatuorde Jose Ignacio Asensiorekin, eta Eusko Jaurlaritzako Lurralde Plangintza, Etxebizitza eta Garraio sailburu Iñaki Arriolarekin batera.
Diputatuordeak adierazi zuen Pasaiak behar duen bultzada lortzeko “berme oso bakarra” dela Izaskun Gomezek udala eta hark aldundia gobernatzea. Asensioren arabera, herriko giro nagusia “utzikeria” zen PSE-EE erakundeetara heldu arte: “Bai EH Bilduk bai EAJk 2011ko agertokira itzuli nahi dute, erabakitzeko eskubidearen eztabaida berreskuratuz. Hor ez gaituzte sozialistok aurkituko”. Maddalen Iriarte EH Bilduko ahaldun nagusi izateko hautagaiaren hitzei erantzun zien esandakoekin, zeinak larunbatean ezker abertzaleko alderdien arteko lankidetzarako deia egin zuen.
“Inora eramaten ez duten identitate-eztabaidetan ez galtzeko bermea gara sozialistok”, gaineratu zuen Asensiok, eta ildo berean mintzatu zen Pasaiako egungo alkatea. Gomezek berretsi zuen PSE-EE agintean denean “behin betiko bultzada” ematen zaiela udalerriko proiektu estrategikoei. Zerrendatu zituen, besteak beste, Donibaneko saneamendua, Antxoko topoa, Andonaegi birgaitzeko laguntzak, Ziritzako aparkalekua, Adinberri, Luzuriaga, edo Lonjako plaza.
“Inbertsio maila hori ez da kasualitatea”, mintzatu zen pasaitarra, izan ere, sozialistak inplikatutako sailen buru baitira bai Eusko Jaurlaritzan, bai Gipuzkoako Foru Aldundian, eta baita Pasaiako Udalean ere. Erakunde horiek EH Bildu buru dutenean, dena hitzetan geratzen dela adierazi zuen: “Hemendik igaro ziren eta ez zuten proiektu bakar bat ere ekarri. Pasaiarekiko eta pasaitarrekiko konpromiso falta hori ez da gertatzen sozialistak erakundeetan daudenean”.
