Oarsoaldeko alkategaiak aurkeztu ditu EH Bilduk
Aurkezpenerako ekitaldia egin zuten larunbatean Errenteria-Oreretan. Maddalen Iriarte ahaldun nagusi izateko hautagaiak ere parte hartu zuen.
Larunbat goizean Oarsoaldeko lau herrietako alkategaiak aurkezteko ekitaldia egin zuen EH Bilduk Errenteria-Oreretako Koldo Mitxelena ikastetxeko jolastokian. Maddalen Iriarte ahaldun nagusi izateko hautagaiak ere parte hartu zuen ekitaldian. Aizpea Otaegi (Errenteria-Orereta), Teo Alberro (Pasaia), Joana Mendiboure (Oiartzun) eta Mikel Arruti (Lezo) dira koalizioaren lau herrietako zerrendaburuak maiatzaren 28ko udal hauteskundeetarako.
Hizketaldietan, Aizpea Otaegik nabarmendu zuen euren zereginean “benetan inporta duena erdigunean” jarriko dutela, eta euren anbizioa ez dela pertsonala, “kolektiboa baizik”. Hala, esku artean dituzten medio guztiak ongizate komunaren bila jarriko dituztela adierazi zuen, “bizitza duin eta justuagoak eraikitzeko anbizioa dugu. Eta hori da izan daitekeen anbiziorik handiena”. Horri ekiteko kolektiboaren indarra nabarmendu zuen Otaegik.
Maddalen Iriartek, bere aldetik, elkar eragiteko eta kooperatzeko gaitasuna nabarmendu zuen. “Horren harira, hemen Errenterian edo bestelako tokietan egindako akordioak dira erakusgarri. Gure DNAren zati da hori. Ezkerreko alderdi politikoek anbizioa izan behar dute egunez egun herritarren bizitza hobetzeko. Hori da gure konpromisoa. Aldunditik ere egingo dugu. Zintzoki diot Gipuzkoako ezkerreko beste alderdiek ere bide hori jarraitzea espero dudala, politika publikoak indartu eta etorkizun sozio-ekonomiko hobea izateko eta herritarren ongizatean eragiteko. Errenteriako Udalak hori egin du azken urteetan. Badugu adibide sendo bat hemen”.
