'Antimilitarismoak 40 urte' erakusketa zabalduko dute
40 urte beteko dira Errenteria-Oreretako gazte talde batek derrigorrezko zerbitzu militarrerako udal pleno aretoan egiten ari ziren gazteen neurketak boikotatu zituztela eta Oreretako Talde Antimilitarista OTA sartu zutela.
Intsumisioaren aldeko Kakitzaten manifestazio bat. Argazkia:Wikipedia Antimilitarismoak 40 urte erakusketa zabalduko dute bihar, Xenpelar Etxean. Iriekiera ekitaldia 19:00etan egingo dute bihar bertan, eta hilaren 18ra arte bisitatzeko aukera izango da astelehenetik larunbatera 17:00etatik 20:00etara. kartelak, argazkiak eta hemerotekak osatuko du erakusketa, antimilitarismoaren gaineko argazki zabala egiten laguntzeko.
Hitzaldia ere egingo dute, Jakue Paskual soziologo eta kide antimilitaristak eta Josean Izquierdo Oreretako Talde Antimilitaristako kide ohiak, Objezioa, Insumisioa eta antimilitarismoaz. Azken hori, hilaren 15ean, asteazkenarekin, antolatu dute Xenpelar Etxean 18:30etik 20:30era.
Oreretako Talde Antimilitarista izan zeneko kide ohiek antolatu dituzte erakusketa eta hitzaldia. Izan ere, 40 urte beteko dira Errenteria-Oreretako gazte talde batek derrigorrezko zerbitzu militarrerako udal pleno aretoan egiten ari ziren gazteen neurketak boikotatu zituztela. Zehazki, neurria eta pisua hartzeko erabiltzen ari ziren baskula lapurtu zuten gazte antimilitaristek, prozesua oztopatzeko eta derrigorrezko zerbitzu militarraren kontrako jarrera erakusteko.
Hilabete gutxira, duela lau hamarkada ere, sortu zuten Oreretako Talde Antimilitarista OTA. Mugimendu indartsua izan zen, “objekzioa eta intsumisioa bultzatu zituen, eta ezinbestekoa izan zen 2002tik aurrera derrigorrezko zerbitzu militarra bertan behera gelditzea lortzeko”. Helburua lortuta, OTA deuseztatu zuten.
Urteurren borobila ospatzeko eta borroka luze bezain garrantzitsu hura oroitu asmoz antolatu dituzte orain erakusketa eta hitzaldia.
