Iztietako zubiarentzat, jantzi berria
Zubiaren egungo egurrezko zoladura ordezkatzearekin batera sarbideak diren plataformetan konponketak egingo ditu udalak, argiztapen lanak, eta barandak txukundu eta margotu.
Udalak lanak hasi ditu Iztietako oinezkoen zubia konpontzeko. Iztietako oinezkoen zubiaren konponketa eta mantenu lanak hasi ditu Errenteriako Udalak, eta horrenbestez zubia itxita izango da lanak irauten duten bitartean. Ez dira nolanahikoak izango, izan ere, zubiaren egungo egurrezko zoladura ordezkatu du eta horrekin batera sarbideak diren plataformetan konponketak egingo ditu. Argiztapen lanak ere egingo ditu udalak, barandak txukundu eta margotzearekin batera.
138.852 euroko diru zatia bideratuko du udalak dagoeneko martxan diren lanak egiteko, eta Diez y Cia S.A enpresari esleitu dio konponketa eta mantenu lana egitea.
Udalak jakinarazi du asmoa zuela iaz lanekin hasteko, baina lizitazio publikoa hutsik geratu zela: “Oraingoan, modu egokian bete da lizitazio prozesua, eta horrenbestez, auzoko bizilagunekin hartutako beste konpromiso bat ere beteko da”.
