Oarsoaldeko alkategaiak aurkeztu ditu EAJk
Eskualdea arazoei aurre egiteko eta irtenbideak bilatzeko "adibide" dela nabarmendu du EAJk, eta Pasaiako badiaren biziberritzean egindako urratsei balioa eman die.
Larunbatean San Pedron egindako ekitaldian aurkeztu zituen Eusko Alderdi Jeltzaleak (EAJ) Oarsoaldeko lau herrietarako hautatu dituen alkategaiak. Loreto Osa Ocon (Pasaia), Jesus Mari Mariarena (Lezo), Elixabete Murua Mindegia (Errenteria-Orereta) ea Janire Mitxelena Lekuona (Oiartzun) dira. Aurkezpenean Eider Mendoza Larrañaga Gipuzkoako ahaldun nagusi izateko hautagaiak, eta Joseba Egibar Gipuzko Buru Batzarreko presidenteak ere parte hartu zuten. Aurkezpen ekitaldiaren aurretik, lan bilera egin zuten EAJko kideek. Maite Peña Bidasoa-Oiartzun aldundiko hautagaitzako bigarrenak ere izan zuen partaidetza ekitaldian.
Hizketaldien txandan Mendozak egungo gizarteak dituen hainbat arazo aipatu zituen, eta horiei aurre egiteko jarrera “inkonformista” hartu eta aurrera egin beharra dagoela. Oarsoaldea horren adibide bezala jarri zuen: “Arazoei aurre egin eta aurrera egiteko grina horren adibide ona da Oarsoaldea, bere burua berrasmatzen asmatu duena”. Mendozaren arabera, azken bi agintaldietan “pauso nabarmenak” eman dira Pasaiako badiaren biziberritzean, “proiektu ilusionagarriak ditu esku artean Oarsoaldeak”. Eskualdea Gipuzkoa mailako erreferentzia bihurtzeko bidean dela adierazi zuen Mendozak, eta horren adibidetzat Pasaian egitekoa den Adinberri proiektua jarri zuen: “Gipuzkoak aurrera egiteko eta Oarsoaldeak aurrera egiteko, aukerarik onena Eusko Alderdi Jeltzalea da”.
Mendozak solasaldia egin zuen ekitaldian eskualdeko alkategaiekin. Pasaiako Loreto Osarekin babes sozialean eta berdintasunaren alorrean egindako aurrera urratsak izan zituen hizpide. Lezoko Jesus Mari Martiarenarekin, aldiz, udal gobernu batek ekonomia eta enpleguaren alde egin dezakeena “asko” dela nabarmendu zuen. Errenteria-Oreretako Elixabete Muruak EAJk Gipuzkoarako dituen helburu nagusien artean hizkuntza berdintasuna dagoela, eta EAJk euskararen erabilera indartzearen aldeko lanari egin diezaiokeen ekarpenaz mintzatu zen. Oiartzungo Janire Mitxelenak, bere aldetik, jarduera industrialaren eta landa ingurunearen arteko “oreka berdeaz” mintzo zen. Maite Peñak ere adierazi zuen Pasaiako badiaren biziberritzean aurrerapausoak eman direla, Adinberrik prozesu horri emango dion bultzada azpimarratuz.
San Pedroko ekitaldian beste hainbat gaiz adierazpenak egin zituzten EAJko kideek. Horien berri zehatz izateko joan EAJren webgunera (klik egin hemen).
