[Galeria] Morez jantzi dituzte Antxo eta Trintxerpe
Antxoko kaleak eta Trintxerpeko Gernika plaza oihu eta aldarrikapenez bete dituzte dozenaka emakumek. Zaintza sistema iraultzeko premiaz aritu dira.
Aurtengo Martxoaren 8an ere kalera atera dira Pasaiako emakumeak. Antxon Axular plazatik abiatu den mobilizazioa egin dute, eta Trintxerpen, berriz, elkarretaratzea zegoen deituta Gernika plazan. Biak ala biak, 19:30ean. Dozenaka lagunek erantzun diote Harremantxo, Bekoz Beko eta Topaketa talde feministen deiari.
Antxon, barrutiko kale eta plazak zeharkatu ondoren, irakurketa egin dute antolatzaileek. Ildo beretik mintzatu dira trintxerpetarrak ere. Esan dute denbora luzea daramatela emakumeek bizi duten esplotazio egoerak salatzen, baina, orain, “egoera hori kolapsatzen” ari dela diote. Sistema bortxatzaileari kontra egiteko premiaz aritu dira, “egitura heteropatriarkal eta kolonialetan oinarritzen dena”.
Egungo zaintza sistema “irauli” behar dela esan dute, ozen. “Emakumeak gara familian zaintzen ardura gure gain hartzen dugunak, zahar etxeetan zein haur eskoletan lan egiten dugunak, etxeak eta ospitaleak garbitzen ditugunak, zahartzaroan dauden pertsonak egunerokoan laguntzen eta zaintzen ditugunak”. Horri lotuta erantsi dute etxeko langile askok eta migratutako zaintzaileek “preso gisa lan” egiten dutela, eta ez dutela eguneko atsedenik hartzeko eskubiderik. “Ez dute legezko soldata kobratzen, mehatxuak ere jasotzen dituzte, paperik ez dutelako. Baina nork zaintzen du emakume migratu eta arrazializatuak? Nork zaintzen ditu zaintzaileak?”.
Horregatik exijitu dute Atzerritartasun Legea indargabetzea, eta pertsona guztien erregularizazioa ere eskatu dute. Zaintzarako eskubide kolektiboaren aldeko apustua egiten dutela diote, “askatasunez eta arduraz gure bizi osoan zehar duintasunez zainduak izateko zein besteak zaintzeko”. Zaintza iraultzea dena eraldatzea eta emakumeok beti bizi izan dugun indarkeriaren eta desberdintasunaren ardatz nagusietako bat kolpatzea eta astintzea da”, erantsi dute.
Euskal Herriko mugimendu feministaren planteamenduarekin bat egin dute Antxoko emakumeek ere, eta “borroka artikulatu bat” planteatu dute, “greba feminista orokor baterantz”. Antolatzeko, bat egiteko, aliantzak sortzeko eta agenda politikoa eta aldarrikapenak sortzeko gai direla erantsi dute. “Ez dugu promesa huts gehiagorik nahi, ezta gure diskurtsoaren kaptazio gehiagorik nahi ere”. Azkenik, zaintzarako eskubide unibertsala exijitu dute, eta “zaintza horiek negozio izateari uztea”. Aipatutako greba orokor horretarako bidean, gaurkoa “lehen urratsa” izan dela gaineratu dute.
Trintxerpen, hitza hartu duten emakumeek ez dute mintzaldia bukatu nahi izan aldarrikatuz ez dituztela soilik emakume langileen eskubideak defendatu nahi, baizik eta neska gazte ikasleen bizitzak ere erdigunean nahi dituztela: “Instituzioek oso baldintza gutxi eskaintzen dituzte ikasgeletan gure lasaitasun eta segurtasuna bermatzeko”.
Jarraian, HITZAk arratsaldeko topaketetan ateratako argazkiak:
