[Galeria] Zaintza "gizarte osoari" dagokiola aldarrikatu dute
Oiartzungo Feministen Asanbladak manifestazioa egin du arratsaldean, eta bukaeran zaintza sareak aldarrikatu dituzte, greba iragartzeaz gain.
Zaintza integrala eta bestelakoa aldarrikatu dute ehunka lagunek. Oiartzungo Feministen Asanbladak deituta, mobilizazioa egin dute gaur herriko kaleetan. Zaintza erdigunean jarri, eta egungo sistema aldatzea aldarrikatu dute ehunka feministek.
Aurreko urteetan egin ohi izan duten bezala, geldialditxoak egin dituzte kaskoko hainbat puntutan. Bertan, zaintzaren arloan —zentzu zabalean ulertuta— lan egiten duten eragileetako emakumeek hartu dute hitza: kulturakoak, Heltakoak, Oinherrikoak —kopla hauek sortu dituzte— Killirikupekoak…
Berean arlotik egin daitezkeen ekarpenak azaldu dituzte, zaintzaren ikuspegitik, era laburrean.
Zinta-dantzan, saretzen
Mobilizazioa hasi duten tokian bukatu dute. Performance bat egin dute plazan; zinta-dantza egiteko zintak eta sare bat osatu dute, gizarte osoari dagokion ardura irudikatuz. Zaintzaren arloan lan egiten duten hainbat eragiletako ordezkariak atera dira, berea hartzera: Killirikupe, etxez etxeko langileak, Petra Lekuona zaharren etxekoak, osasungintzakoak…
Zaintza zer den definitu dute lehendabizi, sei punturekin. Hona hitzez hitz:
- Zaintza jendarteak egunerokotasunean bizirauteko beharrezkoak dituen ekintza eta praktiken multzoa dela esango genuke.
- Gaur egungo sistema kapitalistan ordainsaria duen lana da pertsonen bizitzak, familienak, hiri eta jendarteak antolatzen dituen ardatz nagusi bakarra. Beraz, Zaintza, ardatz honetatik kanpo geratzen den denboran eta ikusezin diren tarteetan gertatzen da.
- Zaintzaile gisa egiten diguten aitortzaren gainean eraikita dago emakume askoren identitatea.
- Kulturak egiten gaitu, bai gu eta baita herria ere. Jatorri, adin eta genero anitzak batzen ditu kulturak.
- Herri zapalduen arteko aliantzak eraiki behar ditugu, batu eta elkartu egin behar dugu. Jatorri anitzeko herria, herri aberatsa da!
- Azken bolada honetan ere badirudi kezkatik bizi dugula Amalurra zaintzearen gaia, energia dela, mugikortasun ereduak direla, elikadura dela.
Zaintza kontzeptua gertuko kideak zaintzetik harago joan behar dela adierazi dute mugimendu feministako kideek. “Pertsonen arteko bestelako kolaborazio eta loturak aitortu behar dira. Zaintzaren ardura kolektiboa dela esaten dugunean, gizarte osoari ardurak hartzea dagokiola esan nahi dugu”. Pertsonak “zaurgarriak” diren artean, zainduta izateko eskubidea dutela aldarrikatu dute.
Zaintza bizitza sustengatzeko “egitura konplexua” dela nabarmendu dute. Horregatik, erakunde publikoak, merkatua eta komunitatea “kate begi” bilakatu behar direla uste dute.
Greba orokorra
Beste esperientzia, kultura eta egoeraratik elikatu behar dugu, zaintza sare publiko-komunitarioak egonkortzeko esperimentazioan indar egin behar dugu, zaintza ekosistema publiko-komunitario bat behar dugu!”, esan dute.
Horregatik, urtea bukatu baino lehen, mugimendu feministak greba orokorra deituko dutela iragarri dute, “inflexio puntua” izan dadin. “Egungo zaintza erregimen kapitalista eta patriarkala irauli nahi ditugu dena aldatzeko”, zehaztu dute.
Datozen hilabeteetan zaintza eskubide kolektibo baten alde egingo dutela berretsi dute. “Pertsona guztiek bizitza osoan zehar zaintzak askatasunez eta duintasunez emateko eta jasotzeko duten eskubidearen alde”, zehaztu dute. Halaber, zaintzaren erantzukizunari “pribilegioko egoeretatik ihes ez egitea bermatzeaz” ari direla baietsi dute.
Oiartzungo kide feminista guztiei dei egin diete aktiba daitezen, eta prozesuarekin bat egin dezaten. “Iraultza egiteko modurik antikapitalista eta feministena gure burua eta besteak zaintzea da!”.
Bukaerako irakurketa bukatuta, zinta-dantza egin dutenei emakume gehiago batu zaizkie, islatzeko prest daudela saretzeko, eta zaintza eredua buelta emateko.
