Hiru domina poltsikoratu ditu Pasaia Kayakek sasoiko lehen lehian
Neguko Euskadiko Banakako Txapelketan izan da marea urdina, eta egindako lan txukunari esker podiuma osatu dute sailkapen orokorrean.
Pasaia Kayak taldeko kideak, Irunen lehiatutako Euskadiko Txapelketan. 
Hasi da piraguismoko 2023-2024 denboraldia, eta gogotsu bezain indartsu ekin dio Pasaia Kayak taldeak sasoiari. Joan den larunbatean Bidasoko uretan izan zuten norgehiagoka, Irungo Iraupen Luzeko Neguko Euskadiko Banakako Txapelketan. Horren aurretik, Bizkaiko Txapelketan izan zuten urdinek berotzeko aukera, gonbidatu gisa lehiatu baitzuten bertan ere.
Baja garrantzitsuekin abiatu ziren palista pasaitarrak Irunerantz, baina halarik ere lau domina ekarri zituzten etxera larunbatekoan: hiru banakakoak eta azkena taldekako sailkapenean, denen lan txukunaren ondorio.
Senior Gizonen kategoria izan zen, ohi bezala, maila handienekoa eta azkarrena, eta pasaitarrek lan bikaina egin zuten oro har, Ion Carballo eta Iñigo Lois ordezkarien eskutik bereziki. Prestatzaileek aitortu dutenez, “emozioz beteriko proba gogor baten ondoren” brontzezko domina erdietsi zuen bikoteak.
Aipatzekoak, halaber, Maialen Vitoria altzatarrak junior kategorian eta Iñaki Fernandezek beteranoenean lortutako dominak. Maialenek bigarren postuari eutsi zion aurreko taldearekin kontaktua galdu ondoren etsi gabe jarraituz, eta zilarrezko domina eman zion taldeari. Fernandezek, aldiz, Aizpurua anai indartsuak izan zituen garaitu, baina meritu handiko brontzezko domina lortu zuen pasaitarrentzat, saioko hirugarrena.
Iñigo Loisen senior kategoriako laugarren postuaz gain, beste hainbat postu aipagarri lortu zituzten pasaitarrek beren sailkapenetan, eta ahalegin horren guztiaren ondorioz, hirugarren izan zen Pasaia Kayak taldekako sailkapenean, Santiagotarrak txapeldunarekin eta Zumaiako Itxas-Gain txapeldunordearekin podiuma osatuz, Getxo, Barrika, Donostia Kayak eta gainerako euskal taldeen aurretik.
Asebete agertu dira taldeko arduradunak lortutako emaitzekin, eta datorren larunbatean izango den Gipuzkoako Txapelketa Irekian bide beretik jarraitzea eta, ahal dela, hobetzea izango dute helburu. Txikienek ere debuta izango dute Pasaiako uretan, Eskola Kiroleko lehiaketaren barruan, igandean. Marea Urdina abian da berriz, inguruko bazter guztiak zipriztintzeko asmoz.
