[Galeria eta bideoa] Bizitzak erdigunean jarri dituzte
Jendetzak egin zuen bat atzo Oreretako Asanblada Feministak deitutako manifestazioarekin. Belaunaldi ezberdinak, helburu bakarra: jendarte feminista eraikitzea.
Ehunaka herritarrek egin zuten bat manifestazioarekin. Bizitzak erdigunean jartzera deitu du mugimendu feministak enegarrenez. Jendetzak egin zuen bat atzo Oreretako Asanblada Feministak deitutako manifestazioarekin. Belaunaldi ezberdinak, helburu bakarra: jendarte feminista eraikitzea.
Izan ere, “emakumeen itolarrian” oinarritutako sistematik askatzeko bide bakarra feminismoa dela aldarrikatu zuten atzoko protestan, “feminismoak bizi dugun sistema iraultzeko proposamen politiko, kultural, eta ekonomikoa ekarri du mahai gainera, gure bizitzak erdigunean jartzen dituen bake eta justizia bidea, gure bizitza duinduko duen bide bakarra”.
Atzotik, martxan da gainera, sareak ehuntzen eta trinkotzen hasteko bidea greba feminista orokorra helburu: Denon Bizitzak Erdigunean du izena prozesuak, eta herriz herri, auzoz auzo antolatzea ekarriko du, ” aliantzak eta proposamenak bateratuko ditugu herri mugimenduekin eta eragile soziosindikalekin, aldarrikapen agenda bat sortuz”.
Bide horretan, saretzera, ez isiltzera, autodefentsara, barne indarra ateratzera, planto egitera, bizitza erdigunera eramatera deitu dituzte emakumeak.
