San Pedroko zuhaitz bat "babes afektiboko sare" bihurtu dute
Pasaiako kakorratz taldeko emakumeek, Martxoaren 8aren kariaz, artelan morez josi dute herriko plazako zuhaitzen enborretako bat.
Atzoko argazkia, apainketaren ondoren. 
Atzo, Emakumeen Nazioarteko Egunaren aterkipean, Pasaiako kakorratz taldeko emakumeek San Pedroko zuhaitz bat artelan morez apaindu zuten. Komunitatearen, feminismoaren eta belaunaldien arteko zaintzaren ikur bihurtu nahi izan dute enborra.
Azken hiru urteotan egin duten hirugarren jarduera publikoa da zuhaitzaren apainketarena. 2021ean emakumeen eta itsasoaren arteko lotura irudikatu zuten mural batean, eta 2022an kakorratzez egindako erraldoi bat sortu zuten, Biodibertsitatearen Dama, itsasoa eta pertsonak babesteko ikur gisa.
Aurten, esan bezala, mandalak ehundu dituzte tonu moreetan, auzokideen arteko zaintza eta elkarrekiko laguntza sustatzen jarraitzeko, fisikoki eta metaforikoki babes afektiboko sare bat ehuntzeko. Sare hori San Pedroko herriko plazan eserlekuz inguratutako zuhaitz bat estaliz gauzatu da; eta horrekin egoteko, gozatzeko, konektatzeko eta entzuteko leku bat sortu dute barrutian.
Emakumeen zuhaitzaren ekimenean honako hauek hartu dute parte: Goyeneche Fundazioak, Adinkiderekin batera, zuhaitzaren hostoak eta dekorazioa egin ditu makramez, Trintxerpeko Topaketa emakume taldeak parte hartu du, Adinkidek lan komunitarioa koordinatu eta garatu du, Pasaiako Berdintasun Sailarekin batera, eta La Localadelacasa proiektuaren zuzendaritza artistiko-sozialaz arduratu da.
