Joxean Sanchez izango da PSE-EEren Lezoko alkategaia
Proposamen "errealistak" barnebildu dituen programa osatu dutela adierazi du hautagai sozialistak, herriko banako eta eragileekin elkarlanean.
Lezoko PSE-EEk Joxean Sanchez udal taldearen bozeramailea aurkeztu du datorren maiatzaren 28ko udal hauteskundeetarako zerrendaburu gisa. Proposamen “errealistak” barnebilduko dituen programa da haiena, PSE-EEren arabera, non pertsonak izango diren “erdigunea”, eta herriko banako eta eragileekin harremanetan egon direla adierazi dute. Sanchezen helburua “berdintasunarekin, integrazioarekin, gizarte-kohesioarekin eta lankidetzarekin konpromisoa duen” udala da: “udal irekia, herritarren parte-hartzea eta eztabaida kontuan hartuko duena eta beti herritarren ongizatea eta interesak lehenetsiko dituena, desadostasun ideologikoen gainetik”.
Ordezkari sozialistak, gutxiengoa izan arren, azken lau urteotan udal gobernuko kide gisa ezkerretik politikak hauspotu dituztela baieztatu du. Dena den, hobetu beharra dagoela adierazi du ere: auzoen berroneratzea edota eraikinen birgaitzea aipatu ditu erronken artean. Joxean Sanchez Ingurumen zinegotzia izan da azken legegintzaldi honetan.
