OKEko talde nagusiek garaipena lortu dute asteburuan
Emakumeen taldea askoz hobea izan da egoera kaxkarrean zegoen zelaian. Mutilek pixka bat sufrituta lortu dute garaipena, baita areto futbolekoek ere.
Oiartzun eta Eguzkiko kapitainak, epailearekin. Asteburu biribila izan da Oiartzun Kirol Elkarteko talde nagusientzat. Emakumeek larunbat arratsaldean jokatu zuten Ugaldetxon, eta egunean zehar botatako euriak asko baldintzatu zuen partida.
Izan ere, zelaia egoera kaxkarrean zegoen. Lehen zatian, baina, oiartzuarrek aurreratzea lortu zuten, eta beste lau aukera gehiago sortu zituzten Monteren ate aurrean.
Bigarren zatian, soropilaren egoerak okerrera egin zuen, eta jokatzeko azkarregi zegoen. Hala ere, partidaren azkeneko hamar minutuetan beste bi gol sartu zituzten oiartzuarrek, eta garaipen polita lortu zuten, kantabriarrekiko —postu bat beherago zeuden asteburura arte— aldea handituz.
Mutilek, hamarren kontra
Gizonen talde nagusiak Amaikak Baten bisita jaso zuen atzo, eta ederki hasi ziren etxekoak. Aukerak sortu arren, ez zuten debarren ate aurrean asmatu. Epaileak etxeko taldearen aldeko penaltia adierazi zuen, eta horrela aurreratu ziren oiartzuarrak.
Jokaldi horretan hamarrekin geratu ziren bisitariak, baina, hala ere, Oiartzun estutu zuten lehen zatiaren bukaeran. Bigarren zatian ere aukera asko sortu zituzten oiartzuarrek, baina bigarren gola ez zuten 90. minutura arte sartu.
Laugarren postuan daude oiartzuarrak, eta aurten zerbait esanguratsua egiteko beste bultzada bat izan zen atzoko garaipena.
Areto futbola
Lehenengo mailako taldeak Eguzki Lasarteko taldearen bisita jaso zuen ostiral arratsean. Lehenengo zatian eroso atera ziren, eta 3-0 iritsi ziren atsedenaldira. Bigarren zatian gauzak okertu ziren, eta lasartearrek bi gol sartuta, garaipena arriskuan izan zen.
Sufrituta izan bazen ere, hiru puntuak Elorsoron geratu ziren, eta oiartzuarrak play-offetatik bi puntura daude sailkapenean.
Miren Tabernak, berriz, Jaixkiren kontra jokatu zuen, Lezon. Oiartzuarrak bosgarren minutuan aurreratu ziren, baina atsedenaldia iritsi baino lehenago, lezoarrek berdindu zuten. Bigarren zatian Jaixkikoak indartsu atera ziren, eta hiru gol sartu zituzten hamar minututan.
Seigarren postuan egon arren, play-offetatik bi puntura daude oiartzuarrak.
FUTBOLA
Emakumeen Lehen Nazional Maila
- Oiartzun — Monte: 3-0.
Gizonezkoen Ohorezko Erregional Maila
- Oiartzun – Amaikak Bat: 2-0.
Emakumeen Euskal Liga
- Oiartzun B — Alaves B: 1-2.
Gizonen Gorengo Maila
- Roteta – Oiartzun B: 4-0.
Emakumeen Gorengo Maila. Igoera Fasea
- Orioko — Oiartzun C: 3-4.
Mutilen Gazte Mailako Nazional Maila
- Danok Bat – Oiartzun: 4-0.
Mutilen Gazte Mailako Gorengo Maila
- Oiartzun B – San Marcial: 3-0.
Mutilen Gazte Mailako Lehen Maila. Kopa
- Oiartzun C – Ordizia B: 2-3.
ARETO FUTBOLA
Gizonen Gipuzkoako Lehen Maila
- Oiartzun – Eguzki Arkupe Rehabilitaciones: 3-2.
Gizonen Gipuzkoako Bigarren Maila
- Jaixki Areto Futbola – Miren Taberna: 6-3.
