Kendutako zuhaitzen ordezkoak hazten hasi dira
Altamirako bigarren igogailua egiteko lanen harira kendutako 21 zuhaitzak ordezkatu egin dituzte, Institutuko ikasleen laguntzarekin.
Altamirako bigarren igogailua egiten lanen harira, inguru horretan 21 zuhaitz kendu zituzten. Bada horiek badituzte ordezkoak, oraindik hazteko bidea hasi berri badute ere. Hilaren 10ean Lezo Institutuko DBH4ko ikasleek landatu zituzten kendutako horien oinordekoak: sagarminak, makatzak, basaerramuak eta hostazuriak dira. Bertako espezieak, alegia. Lezoko Udaleko lorezainen laguntza izan zuten ikasleek euren zeregin sinbolikoan.
Ez da izan lehen aldia Institutuko ikasleek zuhaitzak landatzen zituztela. Izan ere, hezkuntza zentroaren jolastoki ondoko eremu batean bi urte dira antzeko jarduera egin zutela. Hala, hilaren 10koan berriak jartzeaz gain, duela bi urte hazten hasitakoak nola dauden ezagutu zuten udal lorezainen azalpenekin.
Joxean Sanchez Ingurumen zinegotzia ere izan zen hilaren 10eko landaketan. Pozik mintzo da: “Ekitaldi honen bidez ageria. utzi nahi dugu Lezok ingurumena zaintzen duela. Belaunaldi berriak kontzientziatzeko balio izan du, eta gur ingurunea eta ondare naturala ahalik eta gehien zaindu behar dela adierazteko ere bai”. Lezo Institutuko kideek ere begi onez ikusi dute egitaskoa, beraz, errepikatzeko prest dira.
Ikasleek egindakoa Eskolako Agenda 2030en helburuen barruan kokatu behar dela adierazi du Lezoko Udalak.
