'Sozialistok prest' programa abiatu du PSE-EEk
Programaren barruan, hiru hitzaldi antolatu ditu alderdi sozialistak. Bihar bertan egingo du lehena 18:30ean hasita, eta gizarte politikak eta inklusioa izango ditu hizpide Alfonso Gurpegi Lan eta Inklusio sailburuordeak.
PSE-EEko Luis, Palencia eta Ruiz. Errenteriako PSE-EEk hauteskunde programarekin lanean jarraitzen duela, eta dagoeneko ehundik gora herritarren ekarpenak jaso dituela jakinarazi du gaur. Isaac Palencia sozialisten bozeramaileak, abenduan abiatu zuten prozesuaren bidez, beste erakunde batzuk zaintza, energia komunitateak edota ekonomia garapenaren inguruan martxan dituzten “politika arrakastatsuak” aztertu nahi dituztela azaldu du. Montserrat Luis eta Iñaki Ruiz alderdikideekin batera gaur egin duen agerraldian gaineratu duenez, “eztabaida aberastu nahi dugu esperientzia horien berri gurera ekarrita, eta herritarrei proposamen onenak eskaini gure udalerrirako”.
Hauteskunde programa osatzen jarraitzen du PSE-EEk, eta prozesu berri bat jarri du martxan orain: Sozialistok prest. Horren barruan, hiru hitzaldi antolatu ditu alderdi sozialistak. Bihar bertan egingo du lehena 18:30ean hasita, eta gizarte politikak eta inklusioa izango ditu hizpide Alfonso Gurpegi Lan eta Inklusio sailburuordeak: “Aditua da Gurpigi inklusio politiketan, eta Lanbide zerbitzuaren berrikuntzaren arduraduna, DBE diru-sarrerak bermatzeko errentaren birformulazioarena, edota Oarsoaldean 24 milioi eurotik gora inbertitu dituzten Berpiztu programena”.
Gurpegi ez dela bakarrik arituko hitzaldi horretan gaineratu du Palenciak. Izan ere, Maria Gracia Cipitria gizarte langilea eta adinekoen gaiaren gainean aditua ere hizlari izango da, “batez ere, gaur egun erronka nagusietakoa dugun hirugarren adinekoen bakardadeaz arituko da”.
Bigarren hitzaldia hilaren 22an helduko da. 18:30ean eta oraingoan Reyna aretoan izango da. Subirautza energetikoaz ariko da: “Gipuzkoako Foru aldunditik sustatzen ari dira energia komunitateak eta horien artean erreferentea izaten ari den Zumarragako energia komunitatea lehen eskutik ezagutzeko aukera izango dute bertaratzen direnek, Monika Pedreira aldundiko Ingurumen Zuzendaria izango delako hizlaria”. Berekin batera, Mikel Serrano, Zumarragako alkatea izango da hitzaldian.
Hirugarren hitzaldia, hilaren 29an izango da, eta hainbat adarretatik landuko dute garapen ekonomikoaren gaia. Azken horretan, Irungo alkate Jose Antonio Santano, Eibarko alkate Jon Iraola, eta Zumarrago alkate Mikel Serrano hartuko dute parte. “
Fase berri batera jauzi egin dutela orain esan du Palenciak, “lehenengoan, ekarpenak jaso ditugu hauteskunde programa osatzeko, denetarikoak. Kirol eta kultur eragileekin, auzo elkarteekin eta bestelakoekin biltzen jarraituko dugu, eta orain fase berri bati ekin nahi diogu eztabaida zabaltzeko hauteskunde programa lantzeko”. Jasotako ekarpenak ondo baloratu ditu Palenciak, “gure alderdiaren eta programaren ildoarekin bat datoz eta gehienak txertatu ditugu herri proiektu aberatsagoa egiteko”. Horiek guztiak eskertu ditu.
Agerraldiaren azken hitzak udalari eskaini dizkio PSE-EEren eledunak, “bizilagun dezentek esan digute anbizio falta dagoela, hirugarren udalerria garela eta ez dugula merezi dugun udala. Beharrezkoa da, aurrerakoi guztiak, inkonformistak, datu sozioekonomiko okerrenak izateko prest ez gaudenak, edota herritar eta komertzio galera handiena izan duten udalerrietako bat izatearekin konforme ez gaudenak batzea eta elkarlanean jarraitzea Errenteriak behar duen aldaketa errealitate egiteko”.
