Hemen da 37. Lesoinu
Ostiralean hasi eta hilaren 30era arte luzatuko dira aste pedagogiko-musikalaren jarduera gehienak. Herritarrei zabalik diren bi ikastaro izango dira: beatbox-ena, eta ukelele instrumentura hurbiltzekoa.
Ion Pombar, Laura Martinez eta Xanti Espina, gaurko aurkezpenean. Lezon, eskualdean eta Gipuzkoan erreferente da Lesoinu, Lezoko Aste Pedagogiko Musikala. Aurtengoan 37.enez ekarriko ditu musikaren eta sormenaren azken joerak, bertakoak eta urrunagokoak, herrira. Ostiralean hasi eta hilaren 30era arte luzatuko da egitaraua, eta orotara hamasei izango dira programa osatuko duten jarduerak. Askotarikoak dira.
Gaur aurkeztu dute XXXVII. Lesoinu Laura Martinez jarduneko alkateak, Ion Pombar Kultura zinegotziak, eta Xanti Espina Tomas Garbizu Musika Eskolako zuzendariak. Hain zuzen, aro pedagogiko-musikalaren hiru sustatzaile nagusiak horiek direla azaldu du Espinak: udala, udaleko Kultura Saila, eta musika eskola bera. «Lehen edizioan egin bezala, ilusioz eta energiaz gainezka prestatu dugu Lesoinuren egitaraua. Hamasei jarduera bildu ditugu, eta uste dugu denen gustukoak izango direla», Espinak. Ion Pombarrek, bere aldetik, Lesoinuren indarra urtetik urtera handitzen ari dela baieztatu du agerraldian, eta programazioaren arduradun den Tomas Garbizu Musika Eskolako kideek egiten duten lana eskertu zuen. Esker mezuak itzulera izan zuen Espinaren partetik.
Espinak nabarmendu du Lesoinuren barruko hamasei ekitaldietatik gehien-gehienak doan direla, hiru bakarrik direla ordainpekoak; talde profesionalek emandako saioenak dira sarrera erosi behar diren horiek. Musika emanaldiez gain, hitzaldiak, tailerrak edo mintegiak ere izango direla adierazi du Espinak. «Gazteek erreferentziak behar dituzte. Musika Eskolan ikasketa prozesuan ari dira, baina komenigarria da musikaren beste arlo batzuk ere ikus ditzatela. Gainera, herritarrentzat ere interesgarri diren hainbat osagai daude egitarauaren barruan.
Espinak Lesoinuren barrukoak bost ataletan banatu ditu: Tomas Garbizuko ikasleen emanaldiak; profesional izateko bidean direnenak; profesionalen ikuskizunak; kalean herria girotzeko egiten direnak; eta dibulgazioa ardatz duten ikastaro eta tailerrak. Azken horien artean, martxoaren 29ko beatbox tailerra eta maiatzaren 6ko ukelele tailerra nabarmendu ditu Espinak.
Musikaz harago
Musika eskolako zuzendariak nabarmendu du, musika eskola klasikoen egitekoa aldatzen ari dela. Horri begira, eta beste herrietako ereduari jarraiki, Lezon ere horren gaineko lanketa egin behar dela uste du, adibidez, arte eszenikoen arloa ere herriko zentroan txertatuz. Ideia horrek badu eragina egitarauan: ostiralean bertan antzerki musikatua izanen da Gezalan, eta hilaren 26an (19:30) Abundance dantza ikuskizuna jasoko du herriko antzokiak.
Lesoinuren egitarau oso-osoa ikusteko, klik egin hemen. Behealdean, berriz, lehen ekitaldien zerrenda.
XXXVII. LESOINU. ASTEBURUKO EGITARAUA.
- Hilak 17 (ostirala). 17:15ean, Gezala Auditoriumean, ‘Basoko sekretuak’ ipuin musikatua Amaia Elizagoienen eskutik (3 euro).
- Hilak 18 (larunbata). 12:30ean, Aiton Bordan hasita, kantu jira; 19:30ean, Gezala Auditoriumean, Zumaiako Beko Plaza eta Lezoko Sutargi abesbatzen emanaldia.
- Hilak 19 (igandea). 11:00etan, herritik zehar, Tomas Garbizu Musika Eskolako txistularien diana; 19:30ean, Gezala Auditoriumean, Thrigger biolontxelo taldearen kontzertua (8 euro).
