OTXEkoak, egurrean Espainiako Kopan
Emaitzarik aipagarriena Gexan Albisuk 23 urtez azpikoetan lortutako hirugarren postua izan zen. Beste ordezkariak ere, borrokalari eta bikain.
Gexan Albisu (eskuinetik bigarrena) Valladolideko podiumean. Martxoaren 1ean Lezon egin zuten sasoiko aurkezpenean Oarsoaldeko Txirrindularitza Eskolako kideek iragarri zuten gaztetxoenek ikastea, gozatzea eta probatzea zutela helburu, eta koskorragoak ahalik eta emaitza onenak lortzea. Bada emaitzak iristen hasi dira: Espainiako BTT Kopako bigarren proba egin zen hilaren 12an Valladoliden, eta oso aipatzekoak dira han lortutako emaitzak, tartean podium bat: historikoa izan zen.
Podiuma Gexan Albisuk lortu zuen 23 urtez azpikoen mailan, hirugarren izan zen oiartzuarra kategoria horretako lehian. “Espainiako Kopan gure historiako lehen podiuma lortu zuen”, esan dute OTXEkoek. Zirkuituari zazpi itzulikoa zen haren lehia, eta hasieratik aurrekoekin izan zen nor baino nor, nahiz eta erritmoa ikaragarrizkoa izan, baita beroa ere. Beroa, ordea, Albisuen aldeko izan zen, beste lasterkariak apurka atzerantz hasi ziren bitartean, hark aurrera urratsa egin zuelako hirugarren izan arte: Karrera hasieratik bi kide ihesean izan ziren, harrapaezinak Albisurentzat.
23 urtez azpikoekin, Junior eta Elitekoak ere izan ziren lehian, karrera berean, baina kategoriaren araberako itzuli kopuruarekin. Hala, juniorretan, Jokin Askaraik meritu handiko 22. postua eskuratu zuen, Eneko Gomez atzerago sailkatu zelarik (45.).
Emakumeen lasterketa nagusian Nahia Polo izan zen. Han Elite Mailako profesionalekin lehian izan zen errenteriarra. Erritmo oso gogorreko lasterketa izan zen hori ere, baina hala ere, oso aipagarria den 17. postua bere egin zuen Polok.
Nesken Gazte Mailan, Magali Albisuk 8. postu izugarria lortu zuen, eta kadetetan, Intza Del Tesok nahiz Iaraia Zapirainek 15. eta 19. tokian gurutzatu zuten helmuga.
Mutilen Kadete Mailan ere OTXEkoen lan bikaina Espainiako Estatuko BTT txirrindulari onenekin aurrez aurre lehian: Peio Munduate 6. izan zen, Aimar Fernandez de Gorostiza 10., eta beste bost partaideek ere den-dena eman zuten; Unai Barrio gazteak azken orduan matxura bat izan, eta berea ez zen bizikleta batekin parte hartu zuen.
