[Bideoa eta argazki galeria] Atzo 'jarana'; gaurtik aurrera, beti bezala, lana
Atzo inauguratu zuen ofizialki Lau Haizetarak Joxepa Antoni Aranberri Anitzenea espazioan duen egoitza.
Lau Haizetara Euskaltzaleon Topaguneak, Joxepa Antoni Aranberri Anitzenea eraikinean duen espazio berriaren inaugurazioa egin zuen atzo arratsaldean. Ekitaldi soziala izan zen, Errenteria-Oreretako eta inguruko euskaltzaleak, euskararen normalizazioari lotutako eragileen ordezkariak, eta herritarrak oro har bildu zituena.
Egoitzaren aretoak banan-banan ezagutu zituzten bertaratutakoak, Lau Haizetarako kideen azalpenak adi-adi entzun zituzten. Lanerako esparru zabala izango du herriko eragileak, erosoa, zentrikoa eta atsegina. Euskaltzaleak jasotzeko prest da. Atzokoan, ordea, gehien goretsi zen espazioa Joxepa Antoni Aranberriren atzealdeko aire libreko zabalgunea izan zen, terraza. Eguraldi aproposarekin, han izan ziren eguneko hizketaldiak nahiz Karena Antzuolako taldearen emanaldia (behean lehen kantaren bideoa), eta noski, zer jan eta edan ez zen falta izan. Une gozo asko, etorkizun oparo eta gozoago baterako, betiere euskararen alde eragiteko.
Hitzen tartean, Mikel Azkaratek hartu zuen Lau Haizetararen mezu instituzionala zabaltzeko ardura. “Badugu lelo txiki bat Lau Haizetaran. Lana egiten dugu, eta lana bezain garrantzitsua jarana da. Beraz, kontzertu hau eta aurkezpena lagun artean antolatzea erabaki dugu”, esan zuen.
Lau Haizetarak 30 urte bete berri ditu (1992ko azaro-abendu partean sortu zuen herriko hizkuntza komunitateak), garai hartan euskara elkarteen aldeko olatuaren zati izanez. “Garai hartatik bi ardatzen gainean izan gara lanean: euskara eta euskal kultura. Gizarte aldakor honetan ematen ari diren aldaketei begira hirugarren ardatz bat gehitzea erabaki genuen pandemiaren erdian egindako gogoeta prozesuan. Egoera berri batera moldatzeko gure jardunari ikuspegi berri bat gehitu diogu. Komunitateari begira, pertsonen artean ardura sozialaren lanketan esperimentazioaren bidea lantzea. Horren inguruan hainbat egitasmo martxan jarri ditugu, eta gehiago jarriko ditugu betiere euskaratik eta euskaraz, eta hizkuntza komunitatea nahiz komunitate orokorra, herria, aintzat hartuta”.
Azkaratek herritarrak Lau Haizetara gehiago ezagutzera gonbidatu zituen, haien jarduerekin bat egitera. Eta eskerrak eman zizkien elkartearen inguruan ibili diren den-denei, bazkideei, “bidelagun izan direnei”, eta baita Errenteriako Udalari ere. “Eraikin hau irekita izatea udalari esker da”.
