Kantabriarrak, oiartzuarren biktima gogokoenak
Partida kaskarra egin arren, Racing Bri irabazi dio Oiartzun Kirol Elkarteko emakumeen talde nagusiak. Mutilek porrot gogorra jaso dute.
Santanderren jokatu zuen hamaikakoa. Oiartzungo emakumeen talde nagusiak lau aldiz jokatu du Kantabriako taldeen kontra, eta lauretan nagusitu da. Pasa den astean Monte gainditu zuen Oiartzunen, eta larunbatean Racing, Santanderren.
Hiru puntuak ekarri bazituzten ere, erakutsi zuten jokoa ez zen onena izan. Etxekoak hasi ziren baloia ongi mugitzen eta aukerak sortzen. Horrela lortu zuten lehenengo gola.
Santandertarrak indartsuago eta gogotsuago aritu ziren arren, oiartzuarrek markagailua irauli zuten atsedenaldira iritsi baino lehenago. Bakarkako bi jokaldi nahikoak izan ziren horretarako.
Bigarren zatian txukunago atera ziren zelaira, eta kontraeraso batean lortu zuten hirugarrena. Gainera, Zori atezainak geldiketa bikain pare bat egin zituen, eta horri esker hiru puntuak Oiartzunerako bidea hartu zuten.
Garaipenari esker, sailkapenean koska bat salto egin eta hirugarren dira orain sailkapenean.
Mutilak, gaizki
Gizonen talde nagusiak Eibarrera egin zuen bisita, eta emaitza oso txarra ekarri zuen handik: 5-0 galdu zuten oiartzuarrek.
Emaitza gogorregia izan zen, baina liderraren kontrako porrota kolpe gogorra izan da. Bosgarren postura jaitsi dira oiartzuarrak.
Areto futbolean, bikain
Lehen taldeak Lazkaon jokatu du asteburuan, eta 0-2 aurreratu ziren oiartzuarrak. Bigarren zatian aldea moztu, eta aukera gehiago sortu zituzten goierritarrek. Hala ere, ez zuten asmatu; oiartzuarrek bai, eta 1-3 bukatu zen partida. Play-offetako postuetatik bi puntuetara daude.
Miren Taberna OKEk, berriz, defentsa lan bikaina erakutsi zuten Eguzkiren kontra. Lehenengo zatian kontraerasoetan erakutsi zuten atzaparra, eta pausaldirako dozena erdi gol sartu zituzten.
Bigarren zatian lasaiago atera ziren, eta lasartearrena izan zen gol bakarra.
Emakumeen Lehen Nazional Maila
- Racing B — Oiartzun: 1-3.
Gizonezkoen Ohorezko Erregional Maila
- Eibar — Oiartzun: 5-0.
Emakumeen Euskal Liga
- Elorrio — Oiartzun B: 3-0.
Gizonen Gorengo Maila
- Oiartzun B — Santo Tomas Lizeoa: 0-2.
Emakumeen Gorengo Maila. Igoera Fasea.
- Oiartzun Ck atsedena izan du asteburuan.
Mutilen Gazte Mailako Nazional Maila
- Oiartzun — Gasteizko Aurrera: 0-1.
Mutilen Gazte Mailako Gorengo Maila
- Santo Tomas Lizeoa — Oiartzun B: 9-1.
Mutilen Gazte Mailako Lehen Maila. Kopa
- Euskalduna B — Oiartzun C: 3-0.
ARETO FUTBOLA
Gizonen Gipuzkoako Lehen Maila
- Lazkao KE Gaur Logistika — Oiartzun KE: 1-3.
Gizonen Gipuzkoako Bigarren Maila
- Miren Taberna OKE — Eguzki Ventanas Isu: 6-1.
