Gurutzera doan bidegorria bukatuta, zortzi auzoak lotuta daude
Elizalde eta Gurutze auzoak konektatu dituen bidegorriko obrak bukatu berri dituzte. Herriko sareak hamalau kilometro ditu denera.
Agustin Lekuona eta Eneritz Arbelaitz, Gurutzeko bidegorri ireki berrian. Gurutze eta Elizalde auzoak lotzen dituen bidegorria erabilgarri dago. Pandemia baino lehen Karrikaraino joaten dena egin zuten, eta Gurutzekoarekin, auzo guztietara iristen da bidegorria.
Bi kilometro eta erdiko luzera du bide berriak. Gurutzeko aparkalekutik abiatu, Malkorra hotelaren atzealdetik pasa, Fraileen Bideraino joaten da eta hortik Legarre kaleraino iristen da. Ibilbide guztia argiztatu du Udalak. 635.000 euroko inbertsioa egin du.
Modu horretan herriko bidegorri sarea hamalau kilometro luzekoa da, Gipuzkoan gehien duenetako bat da. Egunero ehunka lagunek erabiltzen dute, paseorako, ariketa fisikoa egiteko edo herri barruko desplazamenduak egiteko.
Mugikortasuna, hobetzen
Oiartzungo Udalak nabarmendu duenez, herri barruko mugikortasuna bultzatzea da udalaren helburuetako bat. “Ibilgailuen erabilera eta hauek sortzen duten kutsadura gutxitzeko, aukera ezberdinak eskaini nahi izan ditu udalak azken urte hauetan egindako proiektuekin”, zehaztu dute.
Auzoen arteko mugikortasuna hobetzeaz gain, ikastetxeetara, lanera edo erosketak egitera ere oinez joatea bultzatu nahi dute. Horretarako espaloi berriak sortu dituzte —Haurtzarotik Urmendira joateko, edo Makarraztegi industrialdera, esaterako—.
Oinezkoentzako bide seguruagoak sortu dituztela ere gogorarazi dute —Tronpeoko maldan—, edo bizikletentzako bideak egin, Elorrondo kalekoa kasu.
Horrez gain, auzoetan oinezkoek lehentasuna izateko obrak egin dituzte, hala nola Altzibarren zein Landetxe ondoko Yon Oñatibia etorbidean.
Taxibusa eta Xorrola
Mugikortasuna hobetzeko ildoari jarraituz, udalak azpimarratu du Xorrola eta taxibusaren zerbitzua larunbatetara zabaldu dutela.
Urtez urte zerbitzu horiek gero eta erabiltzaile gehiago dituztela jakinarazi dute. Xorrolak 2022an 78.865 bidaiari izan zituen, 2021ean baino 3.800 gehiago.
Taxibusak 4.800 bidaiari izan zituen.
Ekialdebus hobetzeko eskaera
Udalaren esanetan, garraio publikoa are gehiago erabiltzeko “ezinbestekoa” da egun Donostiarekin lotzen duen autobus linea hobetzea.
Azaldu dutenez, aldundiarena da herrien arteko lotura kudeatzeko eskumena duena. Azken bi urteetan udalak bi zerbitzu berri jartzeko eskatu dio aldundiak: Oiartzundik Donostiara doan autobus zuzena eta Oiartzundik ospitalera doan bestea. “Aldundiak erantzunik eman ez badu ere, bi linea hauek jartzeko lanean jarraituko du Udalak”, adierazi dute.
