Katuen Etxadiko parkea eta Biteri plaza konpontzeko sinadurak biltzen ari dira
Pasai Antxoko 354 bizilagunek sinatu dute, gaur artean, udalari "egoera tamalgarrian" dauden azpiegiturak konpon ditzan galdegiteko eskaera.
“Lau amatxo”; hala aurkeztu dute euren burua Pasai Antxoko zenbat azpiegituraren “egoera tamalgarria” salatzeko bat egin duten antxotarrek. Zehazki, Katuen Etxadiko parkea (Dia supermerkatuaren albokoa) eta Biteri plaza konpon ditzaten eskatzeko 354 sinadura bildu dituzte jada.
Bildu bakarrik ez, dagoeneko HAZ bulegoan erregistratu ere egin dituzte sinadura horiek, eta datorren astean beste hainbeste jaso eta erregistratzeko asmoa azaldu dute. Ekarpena egin nahi duenarentzat, sinatzeko orriak utzi dituzte Txiribin Txaraban liburu dendan, Txema gozoki dendan, Axular tabernan eta Nautika Muro dendan.
Udaletxean erregistratutako orrian honakoa eskatu dute: “Espazio hauetan horien xedearekin bateraezinak diren kalte larriak daude. Udal arduradunei eskatzen diegu premiazko neurriak har ditzatela bi espazio hauek egokitzeko eta gure haurrentzako gune seguru bihurtzeko, batez ere topoko obrek haiei zuzendutako espazio gehienak okupatu dituzten garaian”.
Aukera probestu dute gaztetxoentzako jolasgune estali bat eskatzeko Pasai Antxon. “Guk proposatzen duguna ez da kapritxo bat, beharra baizik. Gure seme-alabek herrian euren bizitza soziala bizi eta garatzea nahi badugu, segurtasunez jolastu eta sozializatzeko espazioak behar ditugu”.
