Oarsoaldeko feministen topagunea, larunbatean
Besteak beste ahalduntze tailerra eta mahai-ingurua egingo dituzte Ibai Ondon. Arratsaldean, festarako tartea izango da.
Larunbatean (hilak 25) egingo dute Lezon Oarsoaldeko feministak batuko dituen topagunea. «Elkarren artean saretzen eta ezagutzen jarraitu nahi dugu», esan dute iniziatibaren bultzatzaileek. Azaldu dute eskualdeko hainbat kide feministak antolatutako eguna izango dela.
09:00etan, ahalduntze tailerra hasiko dute Ibai Ondon, eta eguerdiko poteoaren ondotik, bazkarirako tartea hartuko dute (izena emateko 677 82 04 66 telefono zenbakira deitu). Bazkalostean, 17:00etan, mahai-inguruari ekingo diote: Oarsoaldeko taldeok protokoloa landuz gaiaz ariko dira hizketan Antxoko Harremantxoko, Oiartzungo Feministen Asanbladako, Oreretako Asanblada Feministako, nahiz Piztu Lezoko ordezkariak.
Mahai-inguruaren ondoren, Txerrimuñora lekualdatuko dituzte eguneko jarduerak. Hala, 20:00etan bingo musikatua eta karaokea egingo dituzte baserrian, eta 22:00etan DJ Mari&Nazkaneren saioa hasiko da.
