Pasai Antxoko Aste Musikala, datorren asteburuan
Emanaldiak Illunbe Musika Bandaren, eta Ganbara, Bautista Gisasola eta Easo Gaztetxo abesbatzen eskutik izango dira ikusgai Antxon.
Andrea Palomares Kultura zinegotzia eta Txema Hernandez Pasaia Musika Bandaren presidentea, Antxoko elizaren kanpoaldean. 
Pasaia Musika Bandak, Pasaiako Udaleko Kultur sailaren eta Antxoko San Fermin elizaren laguntzaz, aurten ere Pasai Antxoko Aste Musikala antolatu du. 2020 eta 2021ekoa koronabirusagatik bertan behera utzi behar izan zituzten, eta elkarteko presidente Txema Hernandezek aipatu duenez, ia 30 urteko ibilbidearen ondoren, astea “lehen eguneko ilusio berarekin” antolatu dute.
Programaren aterkipean, musika talde eta abesbatzek Pasaiako barrutia hartuko dute larunbat eta igandean, asteburua girotu asmoz. Hiru emanaldi izango dira guztira, bat larunbatean eta igandean beste biak.
Zikloa Ganbara abesbatzak inauguratuko du, larunbatean 20:00etan San Fermin elizan emango duen kontzertuarekin. Igandeko lehena Illunbe Musika Bandarena izango da, Biteri plazan (euriarekin, Ibaiondo pilotalekura lekualdatuko dute), 13:00etan. Azkenik, gazteentzako tartea: Juan Bautista Gisasola haur abesbatzak eta Easo Gaztetxo abesbatzak elkarlanean itxiko dute egitaraua, igandean, 19:00etan, elizan bertan.
Aipaturiko hiru emanaldiak doakoak dira, eta ez da inolako sarrerarik erreserbatu beharko ikusle gisa bertaratu ahal izateko.
