2024ko Pasaia Itsas Festibala prestatzen hasiak dira
Gaur goizean egin dute kultur jaialdiaren lehen aurkezpena. Oraingoz aurreratu dutena, datak: maiatzaren 9an hasi eta 12an bukatuko da.
Izaskun Gomez eta Xabier Agote, gaur goizeko prentsaurrekoan. 
Gaur goizean prentsaurrekoa egin dute Juanba Berasategin, 2024ko Pasaia Itsas Festibalari buruzko lehen zertzeladak emateko. Kultur jaialdiaren hirugarren edizioa datorren urteko maiatzaren 9an —osteguna— hasi eta 12an bukatuko da —igandea—.
Lau egun horien antolakuntza azken bi edizioetan bezalakoa izango dela ziurtatu du Izaskun Gomez Pasaiako alkateak, udalerriko barruti guztietan eskaintza bermatzen ahaleginduko direlarik. “Itsas Festibala behar dugu Pasaia itsas kultur ekimenen mapa internazionalean kokatu eta honek duen potentzial guztia erabiliz aberastasun eta enplegu berriak sortzeko”, mintzatu da.
Jarraian hitza hartu du Pasaiako Itsas Festibaleko Zuzendari eta Albaolako Presidente Xabier Agotek, PIFari gorazarre egiteko: “Pozik gaude orain arte eginiko ibilbidearekin, batez ere egiaztatu dugulako publiko orokorrak gure itsas kultur ondare bikainaren gakoak ezagutu ditzan, eta ondorioz, honekiko interes eta estimua areagotzeko balio duelako”.
Festibalak 135.000 bisitari erakarri zituen herrira azken edizioan, eta zifra hori hobetu nahi dute hurrengoan. Nola lortuko duten hori, baina, ez dute aurreratu nahi izan gaurko ekitaldian; ez eta 2024koan zein izango den “ohorezko gonbidatua”. Informazio hori, oraingoz, sekretupean gordetzeko baimena eskatu die Gomezek gaur bertaraturikoei.
David Candelario Pasaiako Portu Agintaritzako Zuzendariak esan du erakundeko kideentzat “ohorea” dela PIFean laguntzea, “izan ere, ezaugarri horiek portuaren eta badiaren historiaren beraren parte dira”. Maria Jose Telleria, Gipuzkoako Foru Aldundiko Kultura, Lankidetza, Gazteria eta Kirol Diputatua mintzatu da Candelarioren ondotik, eta Daniel Solana, Basquetour, Eusko Jaurlaritzako Turismoaren Euskal Agentziako Zuzendariak, itxi du ekitaldia.
Hitzaldiaren bukaeran, 2024ko PIFaren promozio bideoa eman eta euskarri izango duen kartela aurkeztu dute. Azken hori Maria Fernandez artistak egin du; duela 17 urte du Pasai San Pedron bere estudio eta bizitokia.
