Pilotaleku berria eraikiko dute Altzibarren
Olaldeko zelaia izango da kokalekua. Pilotarako eremua izateaz gain, auzotarrentzako estalpea izango da eremua; beraien eskaera da.
Altzibarko frontoi berriaren zirriborroa. Irudia ez da behin-betikoa. Altzibarrek estalpea izango duela iragarri du udalak. Uda bukaeran hasiko dira eraikitzen. 30 metro luzeko pilotalekua izango da, eta kirolerako izateaz gain, auzotarrak biltzeko gunea izango da.
Aldagelak, komun irekiak eta harmaila txiki batzuk ere izango ditu eremu berriak. Olalde atzeko zelaian eraikiko dute, hainbat ezaugarri betetzen dituelako: nahikoa leku egotea; inpaktu bisual txikia; irisgarritasun errazekoa izatea; eta segurtasuna bermatuta izatea.
Xehetasun gehiago eman ditu udalak: “Bertan mendiak duen altuera aprobetxatu eta bere erliebearen ondoan egingo da frontoiko pareta nagusia, horrela inguruarekin integratuta gelditzeko. Trafikorik ez du inguruan eta bidegorria bertatik pasatzen da”.
Auzotarrekin adostasuna
Udalak proiektua pasa den udazkenean aurkeztu zien altzibartarrei, eta haien adostasuna jaso zuten. 1.000.000 euroko inbertsioa egingo du Udalak gune hau egiteko. Proiektua idazketa fasean dago orain.
